छोटी भन्सार हटाउने निर्णयप्रति रास्वपाको ध्यानाकर्षण 

सिरहा । सिरहाको बरियारपट्टी गाउँपालिकामा रहेको छोटी भन्सार कार्यालय हटाउने सरकारको निर्णयप्रति राष्ट्रिय स्वतन्त्र पार्टी (रास्वपा) सिरहाले आफ्नो गम्भीर ध्यानाकर्षण भएको जनाएको छ ।

रास्वपा सिरहाका सभापति हरिप्रसाद मैनालीले एक ध्यानाकर्षण पत्र जारी गर्दै छोटी भन्सार कार्यालयलाई विस्थापित गर्नुको सट्टा त्यसलाई आधुनिक र सुविधा सम्पन्न भन्सार कार्यालयका रूपमा विकास गर्न सरकारसँग माग गरिएको छ । सिमानामा हुने व्यापारिक सहजता र स्थानीय आवश्यकतालाई मध्यनजर गर्दै कार्यालयको स्तरोन्नति आवश्यक रहेको रास्वपाको ठहर छ ।

Advertisement

ध्यानाकर्षण पत्रमार्फत रास्वपाले सिरहाबाट निर्वाचित प्रतिनिधिसभा सदस्य लगायतका जनप्रतिनिधिहरूलाई राज्य र जनताको हित अनुकूल हुने गरी यस विषयमा आवश्यक पहल कदमी लिन समेत अनुरोध गरेको छ ।

यद्यपि, रास्वपाले यस विषयमा आफ्नो विरोधको स्वरूप भने भिन्न राखेको छ । जिल्ला सभापति मैनालीले जारी गरेको सोही ध्यानाकर्षण पत्रमा पार्टीका नेता, कार्यकर्ता तथा पदाधिकारीहरूलाई सरकारको निर्णयविरुद्ध सडक आन्दोलन, प्रदर्शन वा भौतिक विरोधका कार्यक्रमहरू नगर्न निर्देशन दिइएको छ ।

पार्टीले संयमित रहेर आफ्ना मागहरू सम्बन्धित निकायसम्म पुर्‍याउने बताएको छ । बरियारपट्टी छोटी भन्सार कार्यालय हटाउने सरकारी निर्णय सार्वजनिक भएदेखि नै स्थानीय बासिन्दा र व्यापारीहरू भने आक्रोशित छन् । कार्यालय हटाउँदा व्यापार र दैनिक जीवनमा असर पर्ने भन्दै उनीहरूले विगत केही समयदेखि निरन्तर विरोध र आन्दोलनका कार्यक्रमहरू सञ्चालन गर्दै आइरहेका छन् ।