विराटमा नयाँ यूरो वार्ड

विराटनगर । विराट मेडिकल कलेज टिचिङ अस्पतालले यूरोलोजी, एन्ड्रोलोजी तथा रेनल ट्रान्सप्लान्ट सेवाका लागि छुट्टै अत्याधुनिक वार्ड सञ्चालनमा ल्याएको छ ।

अस्पतालको पाँचौं तल्लामा निर्माण गरिएको ७० बेड क्षमताको नयाँ वार्ड औपचारिक रूपमा उद्घाटन गरिएको हो । मूत्र प्रणाली, पुरुष प्रजनन स्वास्थ्य र मिर्गौला रोगसम्बन्धी बिरामीलाई एकीकृत तथा विशेषज्ञ सेवा दिने उद्देश्यले वार्ड सञ्चालनमा ल्याइएको अस्पतालले जनाएको छ ।

Advertisement

नयाँ वार्डमा आधुनिक शल्यक्रिया कक्ष, अत्याधुनिक परीक्षण उपकरण तथा विशेषज्ञ चिकित्सकको टोली व्यवस्था गरिएको छ । अस्पतालका संस्थापक अध्यक्ष प्रो.डा. ज्ञानेन्द्रमान सिंह कार्की, वरिष्ठ यूरो सर्जन प्रो.डा. चन्द्रशेखर अग्रवाल, प्रो.डा. दीपककुमार ठाकुर र डा. इमरान अन्सारीले संयुक्त रूपमा वार्ड उद्घाटन गरेका थिए ।

यसअघि यूरोलोजी र सर्जरीका बिरामी एउटै वार्डमा राखिँदा व्यवस्थापनमा कठिनाइ हुने गरेको थियो । अब तीनवटै सेवा एउटै स्थानबाट सञ्चालन हुँदा उपचार प्रक्रिया सहज र प्रभावकारी हुने अस्पतालको दाबी छ ।

अस्पतालमा हाल दूरबिन र लेजर प्रविधिबाट शल्यक्रिया हुँदै आएको छ । आगामी दिनमा मिर्गौला प्रत्यारोपण र रोबोटिक सर्जरी सेवा समेत सुरु गर्ने योजना रहेको अस्पतालले जनाएको छ ।