घरेलु हिंसा पीडितलाई सहयोग

Share this
777shares
मुलुकी खबर
मुलुकी खबर
clock२०८३ बैशाख ३०, बुधबार ०८:०१

विराटनगर । मोरङको सुन्दरहरैँचा नगरपालिका–८ एकता टोलकी घरेलु हिंसा पीडित ४७ वर्षीया अम्बिका कार्कीलाई मानव अधिकारवादी संस्था अनौपचारिक क्षेत्र सेवा केन्द्र (इन्सेक)ले कानुनी प्रक्रियाका लागि आर्थिक सहयोग प्रदान गरेको छ ।

इन्सेक कोशी प्रदेश कार्यालय विराटनगरले कानुनी प्रक्रियाका लागि ७ हजार ५ सय रूपैयाँ आर्थिक सहयोग गनुका साथै जिल्ला अदालत मोरङमा फिरादपत्र दर्ता गराएको छ । नाबालक ११ वर्षीय छोराको संरक्षक भई आफ्नो हकमा समेत घरेलु हिंसा पीडित अम्बिका कार्कीले पति पूर्णबहादुर न्यौपानेविरुद्ध जिल्ला अदालतमा दिइएको उजुरी वैशाख २५ गते दर्ता गराइएको इन्सेक कोशी प्रदेश संयोजक मनोहरकुमार पोखरेलले बताए ।

इन्सेक कोशी प्रदेश कार्यालयमा वडा कार्यालयको सिफारिससहित पीडितले निवेदन दिएपछि इन्सेकले निःशुल्क कानुनी सहायता उपलब्ध गराएको हो । घरेलु हिंसा पीडित कार्की र न्यौपानेबीच २०५८ फागुन १५ गते सामाजिक परम्परा अनुसार विवाह भएको थियो ।

पति वैदेशिक रोजगारीमा गएपछि आफूसहित छोराहरूको शिक्षा, स्वास्थ्य, औषधोपचारमा वेवास्ता गरेकाले अंश चलन मुद्दा अदालतमा इन्सेकको सहयोगमार्फत दर्ता गराएको कार्कीले बताइन् । घरपरिवार र समाजका भद्र भलादमीबिच २०८३ वैशाख १० गते भएको छलफलमा पति पूर्णबहादुरले छोराहरूको पालन पोषण र पत्नीको पालन पोषण नगर्ने, अंश नदिने भनेपछि आफू इन्सेकसम्म आइपुगेको पीडितको भनाइ छ ।

अंश चलन र घरेलु हिंसा शीर्षकमा जिल्ला अदालतमा मुद्दा दर्ता भएपछि पीडितमा न्याय पाउने आशा जागेको इन्सेक कोशीका प्रलेख अधिकृत पुण्य अधिकारीले बताए ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.