साफ महिला च्याम्पियनसिपको उद्घाटनमा नेपाल र भुटान भिड्दै

काठमाडौं । साफ महिला च्याम्पियनसिपको आठौं संस्करण आज (सोमबार)देखि भारतको गोवामा सुरु हुँदैछ ।

प्रतियोगितामा उपाधि जित्ने लक्ष्यसहित नेपाली महिला राष्ट्रिय फुटबल टोली मैदान उत्रिएको छ । नेपालले आफ्नो पहिलो एवं उद्घाटन खेलमा सोमबार भुटानसँग प्रतिस्पर्धा गर्दै प्रतियोगिताको सुरुआत गर्नेछ ।

Advertisement

समूह ‘ए’ मा रहेको नेपाल र भुटानबीचको खेल गोवास्थित जवाहरलाल नेहरू स्टेडियममा नेपाली समयअनुसार दिउँसो ४ः४५ बजेतिर सुरु हुनेछ । समूह चरणको खेल नेपालका लागि महत्त्वपूर्ण मानिएको छ । किनकि सुरुआती जितले सेमिफाइनल यात्रा सहज बनाउने छ ।

प्रतियोगिताको अन्य खेलमा समूह ‘बी’ अन्तर्गत आयोजक भारतले माल्दिभ्ससँग प्रतिस्पर्धा गर्ने तालिका रहेको छ । भारतलार्य यस संस्करणमा पनि बलियो दाबेदारका रूपमा हेरिएको छ भने नेपाल पनि उपाधि दाबेदार टोलीमध्ये एक हो ।

तर, नेपालका लागि यो संस्करण केही चुनौतीपूर्ण बनेको छ । किनभने टोलीकी प्रमुख फरवार्ड तथा सर्वाधिक गोलकर्तामध्ये एक सावित्रा भण्डारी ‘साम्बा’ बिना नै टोलीले प्रतियोगितामा प्रतिस्पर्धा गर्नेछ । उनको अनुपस्थितिले आक्रमण पंक्तिमा केही दबाब बढ्ने अनुमान गरिएको छ ।

सावित्राको अभावमा पनि टोलीको नेतृत्व गोलकिपर एन्जिला तुम्बापो सुब्बाले सम्हालेकी छन् । उनले लगातार तेस्रो पटक साफ महिला च्याम्पियनसिपमा कप्तानी गर्दै टोलीलाई अघि बढाइरहेकी छन् । अनुभवी र युवा खेलाडीको संयोजनसहित नेपालले समूह चरण पार गर्दै उपाधि लक्ष्यतर्फ अघि बढ्ने योजना बनाएको छ ।

नेपालले सोमबारको खेलमा आक्रामक सुरुआत गर्दै जित निकाल्ने रणनीति अपनाएको देखिन्छ । समूह चरणको पहिलो खेलमै अंक जोड्न सके प्रतियोगिताको बाँकी यात्रा सहज बन्ने छ ।