२०८३ जेष्ठ १३, बुधबार १६:५७
काठमाडौं । एसियन गेम्सको महिला क्रिकेट छनोट प्रतियोगितामा नेपालले चीनलाई पराजित गर्दै विजयी सुरुवात गरेको छ । प्रतियोगिताअन्तर्गत बुधबार भएको आफ्नो पहिलो खेलमा नेपालले चीनलाई १९ रनले पराजित गर्दै विजयी सुरुवात गरेको हो ।
नेपालले दिएको १२६ रनको लक्ष्य पछ्याएको चीनले २० ओभरमा ५ विकेट गुमाउँदै १०६ रनमै समेटियो । कप्तान झु मिङ्गेले सर्वाधिक ३० रन बनाइन् । वान हुइङले २१ रन बनाइन् । वेइ हाइटिङले १८ तथा लि जियापिङले १५ रन बनाइन् ।
कप्तान झु आउट हुनुअघिसम्म चीन १५.५ ओभरमा ९० रन २ विकेटको अवस्थामा थियो । मनिषा उपाध्यायको बलमा उनी आउट भएपछि चीनको रनगति कम भएको थियो । नेपालका लागि रिया शर्माले २ विकेट लिइन् भने कविता कुँवर, मनिषा उपाध्याय र पूजा महतोले १–१ विकेट लिए ।
त्यसअघि मलेसियाको वायुमास ओभलमा टस जितेर पहिले ब्याटिङ गरेको नेपालले २० ओभरमा ५ विकेट गुमाएर १२५ रन बनाएको थियो । पूजा महतोले ५७ बलमा ६ चौकासहित ६३ रन बनाइन् ।
रुबी पोद्दार २२ रनमा अविजित रहिन् भने सोनी पाख्रिनले १८ रन बनाइन् । कविता कुँवरले ५, सम्झना खड्का र रुबिना क्षेत्रीले ४–४ रन बनाए ।
चीनका लागि मा रुइकेले २ विकेट लिइन् भने वान हुइङ र लिय जियापिङले १–१ विकेट लिए ।
प्रतियोगितामा बिहीबार नेपालले इन्डोनेसियासँग खेल्ने छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
