शान्तिका लागि सी–किम सहकार्य

एजेन्सी । चिनियाँ राष्ट्रपति सी चिनफिङ र उत्तर कोरियाली नेता किम जोङ उनले क्षेत्रीय तथा विश्व शान्ति प्रवर्धनका लागि संयुक्त रूपमा काम गर्ने प्रतिबद्धता व्यक्त गरेका छन् ।

दुवै नेताबीच हालै सम्पन्न भेटवार्तामा द्विपक्षीय सम्बन्धलाई अझ सुदृढ बनाउने र विभिन्न क्षेत्रमा सहकार्य विस्तार गर्ने विषयमा महत्त्वपूर्ण सहमति भएको जनाइएको छ । उत्तर कोरियाको सरकारी समाचार संस्था केन्द्रीय कोरियाली समाचार संस्थाले बुधबार सार्वजनिक गरेको विवरणअनुसार राष्ट्रपति सीले आफ्नो दुईदिने राजकीय भ्रमणपछि पठाएको धन्यवाद सन्देशमा दुई देशका साझा चासोका विषयमा गहन छलफल भएको उल्लेख गरेका छन् ।

Advertisement

उनले चीन र उत्तर कोरियाबीचको सम्बन्धलाई दीर्घकालीन हितका आधारमा थप मजबुत बनाउँदै लैजाने प्रतिबद्धता व्यक्त गरेका छन् । सन्देशमा राष्ट्रपति सीले द्विपक्षीय सम्बन्धको संरक्षण, सुदृढीकरण र विकासका लागि निरन्तर प्रयास गरिने बताएका छन् । साथै, क्षेत्रीय स्थिरता, विश्व शान्ति र साझा विकासका लागि किम जोङ उनसँग मिलेर काम गर्न इच्छुक रहेको उल्लेख गरेका छन् ।

चीनको राष्ट्रिय समाचार संस्था सिन्ह्वाले भ्रमणले दुई देशबीचको सम्बन्धलाई नयाँ उचाइमा पुर्‍याउने समझदारी निर्माण गरेको जनाएको छ । दुवै पक्ष राजनीतिक, आर्थिक, व्यापारिक, सांस्कृतिक, कृषि, प्रविधि तथा पूर्वाधार निर्माणका क्षेत्रमा सहकार्य विस्तार गर्न सहमत भएका छन् । साथै, सरकारहरूबीच रणनीतिक संवादलाई थप घनिष्ठ बनाउने विषयमा पनि समझदारी भएको बताइएको छ ।

चिनियाँ सञ्चारमाध्यमहरूले सीमा नाकाहरू पूर्ण रूपमा सञ्चालनमा ल्याउने, नागरिक हवाई सेवा पुनः सुरु गर्ने तथा अन्तरदेशीय यात्रुवाहक रेल सेवा सञ्चालन गर्ने विषयमा पनि जोड दिएका छन् । यस्ता कदमले दुवै देशलाई आर्थिक तथा सामाजिक रूपमा लाभ पुग्ने अपेक्षा गरिएको छ ।

यसैबीच, प्योङयाङमा दुई नेताले कोरियाली युद्धमा ज्यान गुमाएका चिनियाँ सैनिकहरूको सम्झनामा निर्माण गरिएको चीन–कोरिया मैत्री स्मारकमा श्रद्धाञ्जली अर्पण गरेका थिए । उनीहरूले राजनीतिक प्रशिक्षण केन्द्रको समेत अवलोकन गरेका थिए ।

पर्यवेक्षकहरूका अनुसार सीको भ्रमण र त्यसपछि भएको सहमतिले चीन–उत्तर कोरिया सम्बन्धलाई थप नजिक ल्याउनुका साथै क्षेत्रीय कूटनीतिमा पनि नयाँ सन्देश दिएको छ ।