स्विट्जरल्यान्ड समूह विजेता बन्दै अन्तिम ३२ मा, हारका बाबजुद क्यानडाले रच्यो इतिहास

क्यानडा । फिफा विश्वकप फुटबलअन्तर्गत समूह ‘बी’को अन्तिम खेलमा स्विट्जरल्यान्ड सहआयोजक क्यानडालाई २–१ ले पराजित गर्दै समूह विजेताका रूपमा नकआउट चरणमा प्रवेश गरेको छ ।

यद्यपि, घरेलु समर्थकमाझ खेलेको क्यानडाले हार बेहोरे पनि उपविजेताका रूपमा अन्तिम ३२ मा स्थान सुरक्षित गर्दै आफ्नो विश्वकप इतिहासकै सबैभन्दा ठूलो उपलब्धि हासिल गरेको छ । भ्यानकुभरमा सम्पन्न खेलमा स्विट्जरल्यान्डको जितमा रुबेन भार्गास र जोहान मान्जाम्बीले गोल गरे ।

दुवै गोल दोस्रो हाफको सुरुआती १२ मिनेटभित्र सम्भव भएका थिए । क्यानडाका लागि वैकल्पिक खेलाडी प्रमिस डेभिडले एक गोल फर्काए पनि टोलीलाई हारबाट जोगाउन सकेनन् ।

यस नतिजासँगै स्विट्जरल्यान्ड लगातार चौथो विश्वकपमा नकआउट चरणमा पुग्ने तेस्रो राष्ट्र बनेको छ । यसअघि अर्जेन्टिना र फ्रान्सले मात्र लगातार चार संस्करणमा समूह चरण पार गर्ने उपलब्धि हासिल गरेका थिए ।

समूहमा शीर्ष स्थान हासिल गरेसँगै स्विट्जरल्यान्डले अब जुलाई ३ मा भ्यानकुभरमै हुने अन्तिम ३२ को खेलमा समूह ई, एफ, जी, एच, आई वा जेमध्ये कुनै एक समूहको तेस्रो स्थानमा रहने टोलीसँग प्रतिस्पर्धा गर्नेछ । यता, क्यानडाले भने पहिलो पटक विश्वकपको नकआउट चरणमा स्थान बनाउँदै नयाँ इतिहास रचेको छ ।

विश्वकपमा यसअघि कहिल्यै समूह चरण पार गर्न नसकेको क्यानडा यसपटक अन्तिम ३२ सम्म पुग्न सफल भएको हो । तर, समूह विजेता बन्न नसक्दा प्रशिक्षक जेसी मार्सको टोलीले घरेलु मैदानको सुविधा भने गुमाएको छ । अब उसले बाँकी सबै खेल अमेरिकामा खेल्नुपर्नेछ । क्यानडाको अर्को खेल जुन २८ मा क्यालिफोर्नियास्थित लस एन्जलस स्टेडियममा समूह ‘ए’ को उपविजेता टोलीविरुद्ध हुनेछ ।

खेलको पहिलो हाफ तुलनात्मक रूपमा प्रतिस्पर्धात्मक रहे पनि दुवै टोलीले स्पष्ट अवसर सिर्जना गर्न सकेनन् । आफ्नो १४९औँ अन्तर्राष्ट्रिय खेल खेलिरहेका कप्तान ग्रानिट साकाले स्विट्जरल्यान्डका लागि केही आक्रमण निर्माण गरे पनि पहिलो हाफ गोलरहित बराबरीमा समाप्त भयो ।

गत साता कतारविरुद्ध ६ गोल गर्दै प्रभावशाली प्रदर्शन गरेको क्यानडाले भने यस खेलमा लय समात्न सकेन । पहिलो हाफभर उसले तीन प्रहार मात्रै लक्ष्यतर्फ गर्न सफल भएको थियो ।

दोस्रो हाफ सुरु भएको एक मिनेट नबित्दै स्विट्जरल्यान्डले खेल आफ्नो पक्षमा मोड्यो । जोहान मान्जाम्बीले दिएको उत्कृष्ट क्रसलाई रुबेन भार्गासले सहज रूपमा गोलमा परिणत गर्दै टोलीलाई अग्रता दिलाए । प्रतियोगितामा भार्गासको यो दोस्रो गोल थियो ।

स्विट्जरल्यान्डले अग्रता लिएपछि दबाब बढाउँदै लग्यो । खेलको ५७औँ मिनेटतिर ब्रिल एम्बोलोको उत्कृष्ट होल्डअप खेलपछि प्राप्त अवसरलाई मान्जाम्बीले सदुपयोग गर्दै पेनाल्टी क्षेत्रभित्रबाट गोल गरे । उनको गोलसँगै स्विट्जरल्यान्ड २–० ले अघि बढ्यो र खेलमा मजबुत अवस्थामा पुग्यो ।

दुई गोलले पछि परेको क्यानडाले त्यसपछि आक्रामक खेल प्रस्तुत गर्ने प्रयास गर्‍यो । खेल सकिन १४ मिनेट बाँकी रहँदा मैदान प्रवेश गरेका वैकल्पिक खेलाडी प्रमिस डेभिडले ७६ सेकेन्डमै गोल गर्दै टोलीलाई खेलमा फर्काउने संकेत दिएका थिए । उनको गोलपछि क्यानडाले बराबरीका लागि निरन्तर दबाब सिर्जना गरे पनि स्विट्जरल्यान्डको रक्षापंक्ति दृढ रह्यो ।

बाँकी समयमा थप गोल हुन नसकेपछि स्विट्जरल्यान्डले २–१ को महत्वपूर्ण जित निकाल्यो । पराजय व्यहोरे पनि क्यानडाले उपविजेताका रूपमा नकआउट चरणमा स्थान सुरक्षित गर्न सफल रहँदा स्विट्जरल्यान्ड समूह विजेता बन्दै उपाधि यात्रालाई थप मजबुत बनाएको छ ।