पाराग्वेसँग गोलरहित बराबरी, अष्ट्रेलिया अन्तिम ३२ मा

अमेरिका । पाराग्वेविरुद्ध गोलरहित बराबरीमा रोकिए पनि अष्ट्रेलियाले फिफा विश्वकप २०२६ को नकआउट चरणमा स्थान सुरक्षित गरेको छ ।

समूह ‘डी’ अन्तर्गत शुक्रबार बिहान अमेरिकाको सान फ्रान्सिस्को बे एरिया रंगशालामा सम्पन्न खेलमा दुवै टोलीले गोल गर्न नसक्दा खेल ०–० को बराबरीमा टुंगिएको थियो । प्रतिस्पर्धात्मक बनेको खेलमा दुवै टोलीले गोल गर्ने अवसर सिर्जना गरे पनि कुनै पनि अवसरलाई सदुपयोग गर्न सकेनन् । अन्ततः अंक बाँड्दा अष्ट्रेलियाले समूह उपविजेताको रूपमा अन्तिम ३२ मा स्थान बनाउन सफल भयो ।

Advertisement

यस समूहबाट सहआयोजक अमेरिका ७ अंकसहित शीर्ष स्थानमा रहँदै नकआउट चरणमा प्रवेश गरेको छ भने अष्ट्रेलियाले दोस्रो स्थान ओगट्दै आफ्नो यात्रा अघि बढाएको हो । बराबरीसँगै पाराग्वेको नकआउट चरण पुग्ने सम्भावना भने अझै जीवित छ ।

समूहमा तेस्रो स्थानमा रहेको पाराग्वे अब अन्य समूहका खेलको नतिजामा निर्भर रहनेछ । तेस्रो स्थानमा रहेका टोलीमध्ये उत्कृष्ट आठभित्र पर्न सके पाराग्वेले पनि ३२ मा स्थान बनाउनेछ ।

विश्वकप इतिहासमा अष्ट्रेलियाले समूह चरण पार गरेको यो तेस्रो अवसर हो । सातौं पटक विश्वकप खेलिरहेको अष्ट्रेलियाले यसअघि सन् २००६ र २०२२ मा पनि नकआउट चरणमा स्थान बनाएको थियो । यसपटक फेरि अन्तिम १६ मा पुग्दै उसले विश्व फुटबलको सबैभन्दा ठूलो प्रतियोगितामा आफ्नो निरन्तरता कायम राखेको छ ।

यही समूहबाट टर्की भने ३ अंकमै सीमित रहँदै प्रतियोगिताबाट बाहिरिएको छ । अमेरिका र अष्ट्रेलिया नकआउट चरणमा पुग्दा पाराग्वेले भने आफ्नो भविष्यका लागि अन्य खेलको नतिजा पर्खिनुपर्ने अवस्था बनेको छ ।