हारका बाबजुद अमेरिकाले सम्हाल्यो समूह शीर्षता

अमेरिका । समूह चरणको अन्तिम खेलमा पराजित भए पनि आयोजकमध्ये एक अमेरिका फिफा विश्वकप २०२६ को समूह ‘डी’ को विजेताका रूपमा नकआउट चरणमा प्रवेश गरेको छ ।

लगातार दुई खेलमा जित हासिल गरेर ६ अंक जोडिसकेको अमेरिकाले अन्तिम खेलमा टर्कीसँग ३–२ को हार बेहोरे पनि शीर्ष स्थान जोगाउन सफल भयो । टर्कीले भने अमेरिकामाथि रोमाञ्चक जित निकाल्दै प्रतियोगितामा आफ्नो यात्रा सकारात्मक नतिजासहित टुंग्याएको छ ।

Advertisement

यसअघि पाराग्वे र अस्ट्रेलियासँग लगातार पराजित भएको टर्कीका लागि यो जित समूह चरणको अन्तिम खेलमा प्राप्त सान्त्वना मात्र बन्यो । किनभने नकआउट चरणमा पुग्न आवश्यक अंक उसले संकलन गर्न सकेन ।

खेलको सुरुआतमै अमेरिकाले उत्कृष्ट सुरुआत गरेको थियो । तेस्रो मिनेटमा अस्टिन ट्रस्टीले गोल गर्दै घरेलु टोलीलाई अग्रता दिलाएका थिए । तर, त्यो अग्रता धेरैबेर टिक्न सकेन । खेलको १०औँ मिनेटमा टर्कीका अर्दा गुलरले आकर्षक गोल गर्दै खेललाई १–१ को बराबरीमा ल्याए ।

बराबरीपछि टर्कीले खेलमा आफ्नो पकड बलियो बनायो । ३१औँ मिनेटमा ओर्कुन कोकुले गोल गर्दै पहिलो हाफमा टर्कीलाई २–१ को अग्रता दिलाए ।

दोस्रो हाफको सुरुआतमै अमेरिकाले पुनरागमन गर्ने संकेत देखायो । ४९औँ मिनेटमा सेबस्टियन बरहाल्टरले बराबरी गोल गर्दै खेललाई फेरि २–२ को अवस्थामा पुर्‍याए । त्यसपछि दुवै टोलीले जितका लागि निरन्तर आक्रमण गरे ।

खेल अतिरिक्त समयमा प्रवेश गरेपछि टर्कीले निर्णायक प्रहार गर्‍यो । इन्जुरी समयको आठौँ मिनेट (९८औँ मिनेट)मा कान आयहानले गरेको गोल नै खेलको निर्णायक गोल सावित भयो । उक्त गोलसँगै टर्कीले ३–२ को रोमाञ्चक जित दर्ता गर्‍यो ।

यद्यपि, अन्तिम खेलमा हार बेहोरे पनि अमेरिकाको अघिल्ला दुई जितले उसलाई ६ अंकसहित समूह ‘डी’ को शीर्ष स्थान सुरक्षित गरायो । त्यसैले अमेरिका समूह विजेताका रूपमा नकआउट चरणमा पुगेको छ ।

टर्कीका लागि भने अमेरिकामाथिको जित पर्याप्त हुन सकेन । सुरुआती दुई खेलमा पाराग्वे र अस्ट्रेलियासँग पराजित भएको कारण अन्तिम खेलको तीन अंकले पनि उसलाई अर्को चरणमा पुर्‍याउन सकेन । टोली समूह चरणबाटै बाहिरिन बाध्य भयो ।