इन्जुरी समयमा मार्टिनेली चम्किए, जापानलाई उल्टाउँदै ब्राजिल अन्तिम १६ मा

अमेरिका । पाँच पटकको विश्वविजेता ब्राजिलले अन्तिम क्षणसम्म संघर्ष गर्दै जापानलाई २–१ ले पराजित गरेको छ ।

एक गोलले पछि परेको अवस्थाबाट उत्कृष्ट पुनरागमन गर्दै ब्राजिलले विश्वकप फुटबलको प्रि–क्वाटरफाइनल (अन्तिम १६) मा स्थान सुरक्षित गरेको हो । अत्यन्त प्रतिस्पर्धात्मक बनेको खेलमा जापानले पहिलो हाफमै अग्रता लिएर ब्राजिललाई दबाबमा पारेको थियो । तर, दोस्रो हाफमा खेलमा फर्किएको ब्राजिलले इन्जुरी समयको अन्तिम मिनेटमा निर्णायक गोल गर्दै रोमाञ्चक जित निकाल्न सफल भयो ।

Advertisement

खेलको सुरुआतदेखि नै जापान आत्मविश्वासका साथ प्रस्तुत भएको थियो । पहिलो हाफमा काइशु सानोले ब्राजिलका ड्यानिलोको कमजोर पास बीचमै नियन्त्रणमा लिए । त्यसपछि उनले कासेमिरोलाई छल्दै शक्तिशाली प्रहार गर्दा गोलमा परिणत भएपछि जापानले १–० को अग्रता बनाएको थियो ।

पहिलो हाफभर ब्राजिलले अपेक्षाअनुसारको प्रदर्शन गर्न सकेन । जापानको संगठित र अनुशासित रक्षापंक्तिका कारण ब्राजिलले गोल अवसर सिर्जना गर्न संघर्ष गर्नुपरेको थियो ।

तर, दोस्रो हाफ सुरु भएसँगै कार्लो एन्सेलोटीको टोली फरक लयमा देखियो । खेल पुनः सुरु भएको करिब १० मिनेटपछि कासेमिरोले आएको क्रसलाई उत्कृष्ट हेडमार्फत गोलमा परिणत गर्दै ब्राजिललाई १–१ को बराबरीमा फर्काए ।

बराबरी गोलपछि ब्राजिलले लगातार आक्रमण तीव्र बनायो । त्यसको केही मिनेटपछि टोलीले अर्को उत्कृष्ट अवसर पनि सिर्जना गर्‍यो । भिनिसियस जुनियरको शक्तिशाली प्रहारलाई भने जापानी गोलरक्षक जियन सुजुकीले शानदार बचाउ गर्दै बललाई पोस्टमा ठोक्काएका थिए । त्यसपछि जापानले पुनः आफ्नो रक्षात्मक संरचना मजबुत बनाउँदै ब्राजिललाई सहज अवसर दिन मानेन ।

खेल निर्धारित ९० मिनेट गोलरहित बराबरीतर्फ अघि बढिरहेको जस्तो देखिए पनि ब्राजिलले अन्तिमसम्म दबाब कायम राख्यो । इन्जुरी समयको छैटौं मिनेटमा खेलको निर्णायक मोड आयो ।

खेल सकिन केही सेकेन्ड मात्र बाँकी रहँदा जापानका ओ तानाकीले आफ्नै पेनाल्टी क्षेत्रको किनारमा बल गुमाए । त्यसलाई ब्राजिलले तुरुन्तै आफ्नो नियन्त्रणमा लियो । त्यसपछि ब्रुनो गुइमारेसले दिएको सटिक पासमा गाव्रियल मार्टिनेलीले कुनै गल्ती नगरी बललाई जाली चुमाए । ९६औँ मिनेटमा आएको उक्त गोल नै ब्राजिलको जित सुनिश्चित गर्ने निर्णायक गोल बन्यो ।

मार्टिनेलीको इन्जुरी समयको गोलसँगै ब्राजिलले २–१ को रोमाञ्चक जित दर्ता गर्दै प्रि–क्वाटरफाइनलमा स्थान पक्का गर्‍यो । जापानका लागि भने यो हार अत्यन्त निराशाजनक रह्यो ।

अधिकांश समयसम्म उत्कृष्ट प्रदर्शन गर्दै अग्रता जोगाइरहेको टोली अन्तिम क्षणमा बल गुमाउँदा प्रतियोगिताबाट बाहिरिन बाध्य भयो । अर्कोतर्फ, अन्तिम सिट्टी बज्दासम्म हार नमानेर आक्रमण जारी राखेको ब्राजिलले आफ्नो अनुभव र धैर्यको प्रदर्शन गर्दै पुनरागमन जित निकाल्न सफल भयो ।