साइकलसहित हिलोमा गाडिएको अवस्थामा पुरुष मृत फेला

झापा । झापाको हल्दीबारी गाउँपालिका–२ कलाधर बस्तीस्थित हल्दीबारी–बिर्तामोड भित्री पक्की सडकछेउको जोतिएको खेतमा एक पुरुष मृत अवस्थामा फेला परेका छन् ।

स्थानीयले साइकलसहित अनुहार हिलोमा गाडिएको अवस्थामा शव देखेपछि बिहीबार बिहान ५ः२० बजेतिर प्रहरीलाई खबर गरेका थिए । सूचना प्राप्त हुनासाथ प्रहरी चौकी हल्दीबारीबाट खटिएको टोली घटनास्थल पुगेको थियो ।

मृतक बिर्तामोड नगरपालिका–९ का ४९ वर्षीय होमप्रसाद सुवेदी रहेको प्रहरीले जनाएको छ । मृतकको पहिचान उनकी छोरी हल्दीबारी गाउँपालिका–२ की योगमाया सुवेदी भट्टराईले गरेकी हुन् ।

प्रहरीले घटनास्थल सुरक्षित राखी कानुनी प्रक्रिया अघि बढाएको छ । सुवेदीको मृत्युको कारण खुल्न बाँकी छ । घटनाको थप अनुसन्धान जारी रहेको जानकारी प्रहरीले दिएको छ ।