विराटनगरमा गाईवस्तु खेतमा छाडिएको विवादले कुटपिटको रूप लियो, एक जना घाइते

विराटनगर । विराटनगर महानगरपालिका–१४ जतुवामा गाईवस्तु खेतमा छाडिएको विषयलाई लिएर भएको विवाद कुटपिटमा परिणत भएको छ । कुटपिटबाट एक जना घाइते भएका छन् ।

घटनामा संलग्न दुई जनालाई प्रहरीले पक्राउ गरेको छ । मोरङ प्रहरीका डीएसपी सन्तोष श्रेष्ठका अनुसार शनिबार दिउँसो करिब ४ बजेतिर गाईवस्तु खेतमा छाडिएको विषयमा स्थानीयबीच भनाभन भएपछि विवाद चर्किएको प्रारम्भिक अनुसन्धानबाट खुलेको छ ।

विवाद उग्र बन्दै जँदा ५८ वर्षीया लक्ष्मी यादवमाथि कुटपिट भएको प्रहरीले जनाएको छ । कुटपिटबाट यादव घाइते भएको प्रहरीको भनाइ छ । घटनाको जानकारी प्राप्त सीआरभी जतुवाबाट असई उर्मिला गुरुङको नेतृत्वमा प्रहरी टोली घटनास्थलमा पुगेको थियो ।

प्रहरीले घटनामा संलग्न रहेको आरोपमा विराटनगर–१४ जतुवाका ५९ वर्षीय धनपत यादव र उनका ३७ वर्षीय छोरा राजेश यादवलाई पक्राउ गरेको छ । दुवै जनालाई नियन्त्रणमा लिएर इलाका प्रहरी कार्यालय रानीमा राखिएको छ । घटनाका सम्बन्धमा थप अनुसन्धान भइरहेको प्रहरीले जनाएको छ ।

प्रहरीले घटनाको वास्तविक कारण, कुटपिटको प्रकृति तथा संलग्न व्यक्तिहरूको भूमिकाका बारेमा अनुसन्धान अघि बढाइएको डीएसपी श्रेष्ठले बताए । घटनापछि जतुवामा केही समय तनावको अवस्था सिर्जना भए पनि अहिले स्थिति सामान्य रहेको उनको भनाइ छ ।