ट्रम्पको फोनसँग झुक्यो फिफा, विश्व फुटबलमा नयाँ विवाद

एजेन्सी । अमेरिकाका राष्ट्रपति डोनाल्ड ट्रम्पको विश्वकप फुटबलमा प्रत्यक्ष हस्तक्षेप गरेका छन् । उनको हस्तक्षेपसँगै अमेरिकी स्ट्राइकर फ्लोरियन (फोलारिन) बालोगनमाथिको एक खेलको निलम्बन फिफाले स्थगित गरेपछि विश्व फुटबलमा नयाँ विवाद सुरु भएको छ ।

ट्रम्पले फिफा अध्यक्ष जियानी इन्फान्टिनोलाई फोन गरेर प्रतिबन्ध पुनर्विचार गर्न आग्रह गरेलगत्तै फिफाले अनुशासन संहिताको धारा २७ अन्तर्गत निलम्बन तत्काल कार्यान्वयन नगर्ने निर्णय गरेको हो । यससँगै बोस्निया–हर्जेगोभिनाविरुद्ध रातो कार्ड पाएका बालोगनले अब बेल्जियमविरुद्ध अन्तिम–१६ को खेल खेल्न पाउने भएका छन् ।

Advertisement

फिताको निर्णयपछि ट्रम्पले आफ्नो सामाजिक सञ्जाल ‘ट्रुथ सोसल’मार्फत फिफालाई धन्यवाद दिँदै ‘ठूलो अन्याय सच्याइएको’ प्रतिक्रिया दिएका छन् । अमेरिकी सञ्चारमाध्यम द न्यूयोर्क टाइम्स का अनुसार ट्रम्पले केही दिनअघि नै इन्फान्टिनोसँग टेलिफोन संवाद गरेर अमेरिकाका प्रमुख स्ट्राइकरमाथिको प्रतिबन्ध पुनर्विचार गर्न आग्रह गरेका थिए ।

फिफाको निर्णयसँगै बेल्जियम फुटबल संघ भने आक्रोशित बनेको छ । संघले यो निर्णय फिफाकै प्रतियोगिता नियमावली र अनुशासन संहिताविपरीत भएको दाबी गर्दै आवश्यक परे खेलसम्बन्धी सर्वोच्च मध्यस्थता निकाय ‘कोर्ट अफ आर्बिट्रेसन फर स्पोर्ट्स’ (सीएएस)सम्म जाने तयारी गरिएको जनाएको छ ।

प्रतियोगिता नियमावलीको धारा १०.५ र अनुशासन संहिताअनुसार रातो कार्ड पाएपछि अर्को खेल स्वतः गुमाउनुपर्ने स्पष्ट व्यवस्था छ । यसअघि सबै खेलाडीमा यही नियम लागू गरिएको थियो ।

यद्यपि, फिफाले भने अनुशासन संहिताको धारा २७ प्रयोग गर्दै बालोगनमाथिको प्रतिबन्ध एक वर्षका लागि परीक्षणकालमा राखिएको जनाएको छ । अब उनले सो अवधिमा पुनः यस्तै अनुशासनहीन व्यवहार दोहोर्‍याए मात्रै यो प्रतिबन्ध स्वतः लागू र थप कारबाहीसमेत हुने फिफाले स्पष्ट पारेको छ ।

निर्णय सार्वजनिक भएसँगै सामाजिक सञ्जालमा ट्रम्पको राजनीतिक प्रभावले फिफा प्रभावित भएको हो कि भन्ने बहस चर्किएको छ । खेल टिप्पणीकार र समर्थकहरूले यसलाई असामान्य निर्णय भन्दै प्रश्न उठाइरहेका छन् । बारस्टुल स्पोर्ट्सका संस्थापक डेभ पोर्टनोयले त निर्णयअघि नै ‘रातो कार्ड उल्टिन सक्छ’ भन्ने संकेत दिएका थिए भने निर्णयपछि ट्रम्पसँगको सम्पादित तस्बिर सार्वजनिक गर्दै व्यंग्यात्मक टिप्पणी गरेका थिए ।

अमेरिकी पुरुष राष्ट्रिय टोलीले भने फिफाको निर्णयलाई स्वागत गर्दै बालोगन बेल्जियमविरुद्ध खेल्न योग्य भएकोमा खुसी व्यक्त गरेको छ । प्रशिक्षक माउरिसियो पोचेटिनोले प्रतिबन्धविरुद्धको प्रक्रियामा आफ्नो कुनै भूमिका नरहेको स्पष्ट पार्दै टोलीलाई आगामी खेलका लागि तयार पार्नु नै आफ्नो प्राथमिकता रहेको बताएका छन् ।

यसअघि बालोगनले बोस्नियाविरुद्धको खेलमा आफूले रातो कार्ड नभई पहेँलो कार्ड पाउनुपर्ने बताएका थिए । तर, फिफाले अनिवार्य मानिँदै आएको एक खेलको निलम्बन नै स्थगित गरेपछि विश्व फुटबलमा नियमको समान कार्यान्वयन, राजनीतिक प्रभाव र फिफाको निष्पक्षतामाथि गम्भीर प्रश्न उठेको छ ।