एमबाप्पे–डेम्बेले चम्किँदा फ्रान्स विश्वकपको सेमिफाइनलमा

अमेरिका । अमेरिकाको बोस्टनमा शुक्रबार बिहान सम्पन्न फिफा विश्वकप २०२६ को पहिलो क्वाटरफाइनलमा फ्रान्सले मोरक्कोलाई २–० ले हराउँदै लगातार तेस्रो पटक सेमिफाइनलमा स्थान बनाएको छ ।

पहिलो हाफमा पेनाल्टी गुमाएका कप्तान किलियन एमबाप्पेले दोस्रो हाफमा गोल गर्दै टोलीलाई अग्रता दिलाए भने त्यसको छ मिनेटपछि उसमान डेम्बेलेले अर्को गोल थपे । मोरक्कोका गोलकिपर यासिन बोनोउ पहिलो हाफका नायक बने । उनले २८औँ मिनेटमा एमबाप्पेको पेनाल्टी रोकेका थिए ।

त्यसअघि २५औँ मिनेटमा माजाउरीले एमबाप्पेलाई पेनाल्टी क्षेत्रभित्र लडाएपछि भिडियो सहायक रेफ्रीको समीक्षा पश्चात् फ्रान्सले पेनाल्टी पाएको थियो । बोनोउले उपामेकानोको हेडर र इन्जुरी समयमा लुकास डिग्नेको प्रहार समेत विफल पार्दै पहिलो हाफ गोलरहित राखे ।

तर, दोस्रो हाफमा फ्रान्सले दबाबलाई गोलमा परिणत गर्‍यो । ६०औँ मिनेटमा डिजायर डुएको पासमा एमबाप्पेले जाली चुमाए । त्यसको छ मिनेटपछि एमबाप्पेकै पासमा डेम्बेलेले गोल गर्दै फ्रान्सको जित सुनिश्चित गरे । साविक उपविजेता तथा २०१८ को विश्वविजेता फ्रान्सले अब सेमिफाइनलमा स्पेन र बेल्जियमबीचको विजेतासँग प्रतिस्पर्धा गर्नेछ ।

कतार विश्वकप २०२२ को सेमिफाइनलको पुनःभेटका रूपमा हेरिएको यस खेलमा मोरक्को बदला लिने लक्ष्यसहित मैदानमा उत्रिएको थियो । तर, हारसँगै अन्तर्राष्ट्रिय फुटबलमा उसको लगातार ३४ खेलको अपराजित यात्रा पनि समाप्त भएको छ ।

व्यक्तिगत रूपमा एमबाप्पे उत्कृष्ट लयमा छन् । उनले यस विश्वकपमा आठ गोल र तीन असिस्ट गरेका छन् । गोलसंख्यामा उनी अर्जेन्टिनाका लियोनेल मेसीसँग बराबरीमा भए पनि असिस्टका आधारमा अघि छन् ।

विश्वकप इतिहासमा एमबाप्पेको कुल गोलसंख्या २० पुगेको छ । जुन मेसीको कीर्तिमानभन्दा एकले कम हो । यता डेम्बेलेले प्रतियोगितामा आफ्नो पाँचौँ गोल दर्ता गरेका छन् ।