विराटनगरको पोखरीमा हाम फालेका किशोरको शव उठाउने क्रममा २१ सेल अश्रुग्यास प्रहार

विराटनगर । गाँजा बोकेर मोटरसाइकलमा हिँडिरहेका बेला प्रहरीबाट लखेटिँदा पोखरीमा हाम फालेर ज्यान गुमाएका किशोरको शव उठाउने क्रममा विराटनगरको भेडियारी शुक्रबार केहीबेर तनावग्रस्त बन्यो ।

शव लैजान अवरोध गर्दै आक्रोशित भिडले प्रदर्शन गरेपछि स्थिति नियन्त्रणमा लिने क्रममा प्रहरीले २१ सेल अश्रुग्यास प्रहार गर्नु परेको छ । विराटनगर महानगरपालिका–१८ भेडियारीका १७ वर्षीय मञ्जितकुमार यादव शुक्रबार बिहान १०ः३० बजेतिर भेडियारी पोखरीको बीच भागमा तैरिरहेको अवस्थामा मृत फेला परेका थिए ।

Advertisement

कानुनी प्रक्रिया पूरा गरी शवलाई पोस्टमार्टमका लागि कोशी अस्पताल लैजान खोज्दा मृतकका आफन्त र स्थानीयले बाटो छेकेर प्रदर्शन गरेका थिए । किशोरलाई लखेट्ने प्रहरी टोलीमाथि कारबाहीको माग र मृतक परिवारका लागि क्षतिपूर्तिको माग राख्दै भिडले शव उठाउन दिएन । नारावाजीसहितको प्रदर्शनले अवस्था केहीबेर तनावपूर्ण बन्यो ।

माग पूरा नभएसम्म शव लैजान नदिने अडानमा प्रदर्शनकारीहरू अडिग रहेपछि प्रहरीले स्थिति नियन्त्रणमा लिन सामान्य बल प्रयोग गर्नु परेको मोरङ प्रहरी प्रमुख एसपी कवित कटवालले बताए । भिड तितरबितर पार्न लाठी चार्ज गर्नुका साथै नेपाल प्रहरी र सशस्त्र प्रहरीले अश्रुग्यास प्रहार गर्नु परेको थियो ।

नेपाल प्रहरीले १० र सशस्त्र प्रहरीले ११ सेल अश्रुग्यास प्रहार गरेको हो । आक्रोशित भिडले ढुंगामुढा गर्दा सशस्त्र प्रहरीका इन्स्पेक्टर तारानाथ गौतमको दाहिने कुइना र घुँडामा सामान्य चोट लाग्यो भने जिल्ला प्रहरी कार्यालय मोरङमा कार्यरत जवान दिलिप आचार्यको बायाँ आँखामा समेत सामान्य चोट लागेको छ । दुवै जनाको अवस्था सामान्य रहेको प्रहरीले जनाएको छ ।

घटनास्थलमा अराजक गतिविधि गरेको आरोपमा जहदा गाउँपालिका–१ का २१ वर्षीय राजदीप यादवलाई प्रहरीले पक्राउ गरेको छ । पक्राउ परेका यादवलाई नियन्त्रणमा लिएर इलाका प्रहरी कार्यालय रानीको हिरासतमा राखिएको छ । उनीमाथि थप अनुसन्धान भइरहेको प्रहरीले जनाएको छ ।

प्रहरीको बल प्रयोगपछि प्रदर्शनकारीहरू तितरबितर भएका थिए । अहिले अवस्था सामान्य भइसकेको छ । शवलाई पोस्टमार्टमका लागि कोशी अस्पतालमा राखिएको छ ।

गत बुधबार बिहान ८ः५० बजेतिर अस्थायी प्रहरी पोस्ट भेडियारीको टोलीले बीआर ५० एएल ३६८७ नम्बरको भारतीय मोटरसाइकल रोक्न खोजेको थियो । प्रहरीले रोक्न खोज्दा मोटरसाइकल छाडेर चालक फरार भएका थिए ।

भाग्ने क्रममा भेडियारी पोखरीमा हाम फालेर यादव बेपत्ता भएका थिए । यादवको शव शुक्रबार बिहान पानीमाथि तैरिरहेको अवस्थामा फेला परेको थियो । पोखरीमा तैरिरहेको अवस्थामा फेला परेको शव घटनास्थलबाट उठाउने क्रममा स्थानीयले अवरोध गरेपछि अवस्था केहीबेर तनावग्रस्त बनेको हो ।

यादवले चलाएको मोटरसाइकलको पछाडि सवार अर्का व्यक्ति भारतको सुपौल जिल्ला गनौरा पञ्चायत–५ का ४१ वर्षीय शिवधर यादवलाई प्रहरीले पक्राउ गरेको थियो । पक्राउ परेकाले साथमा बोकेको झोला चेकजाँच गर्दा ६ किलो १३० ग्राम गाँजा बरामद भएको एसपी कटवालले बताए । पक्राउ परेका भारतीय नागरिकमाथि प्रहरीले थप अनुसन्धान गरिरहेको छ ।

विराटनगरमा प्रहरीले पिछा गरेपछि पोखरीमा हाम फालेका किशोर मृत फेला