लागुऔषध कारोबारीमाथि गोली प्रहार

रूपन्देही । रूपन्देहीको मायादेवी गाउँपालिकामा हतियार बोकेर लागुऔषध ओसारपसार गर्न आएका व्यक्तिहरूलाई पक्राउ गर्ने क्रममा प्रहरीले गोली चलाउनु परेको छ । प्रहरीले गोली हानेर एक भारतीय नागरिकसहित तीन जनालाई पक्राउ गरेको छ ।

रूपन्देही प्रहरी र लागुऔषध नियन्त्रण ब्युरोको संयुक्त टोलीले भारतीय मोटरसाइकलमा सवार तीन जनालाई रोकेर जाँचबुझ गर्न खोज्दा उनीहरूले हतियार निकालेको प्रहरीको भनाइ छ । त्यसपछि नियन्त्रणमा लिन गोली चलाउनु परेको र एक भारतीय नागरिकको खुट्टामा गोली लागेको प्रहरीले जनाएको छ । घाइतेलाई उपचार गरी डिस्चार्ज गरिसकिएको छ ।

डीएसपी कृष्णकुमार चन्दका अनुसा, संयुक्त चेकिङमा खटिएको टोलीसँग यी व्यक्तिहरूका बारेमा पहिले नै केही सूचना प्राप्त भएको थियो । रोकिनु र आत्मसमर्पण गर्नु भन्दै बारम्बार चेतावनी दिइए पनि उनीहरू नमानेपछि र हतियार तेर्स्याएपछि मात्र प्रहरीले गोली चलाउने निर्णयमा पुगिएको चन्दको भनाइ छ ।

पक्राउ परेकाको साथबाट एउटा पेस्तोल, दुई राउण्ड गोली, लागुऔषध ब्राउन सुगर (खैरो हेरोइन) र भारतीय नम्बर प्लेटको मोटरसाइकल बरामद गरिएको प्रहरीले जनाएको छ । प्रहरीका अनुसार पक्राउ परेकाहरूलाई हिरासतमा राखेर थप अनुसन्धान अघि बढाइएको छ ।