विद्यार्थीको क्षमता विकासका लागि खेलकुद सामग्री वितरण 

विराटनगर । विराटनगर महानगरपालिका–१७ मा रहेका विद्यालयहरूमा खेलकुद सामग्री वितरण गरिएको छ। वडा कार्यालय र मिल्स फार्क क्लबको समन्वयमा विद्यार्थीहरूको शारीरिक विकास र खेलकुदप्रतिको रुचिलाई प्रोत्साहन गर्ने उद्देश्यले ती सामग्री वितरण गरिएको हो ।

वडाध्यक्ष समिम कमरको प्रमुख आतिथ्यमा आयोजित एक कार्यक्रमका बीच वडाभित्रका विभिन्न विद्यालयका विद्यार्थीहरूलाई खेलकुदका सामग्रीहरू हस्तान्तरण गरियो । सामग्री वितरण गर्दै वडाध्यक्ष कमरले शिक्षासँगै खेलकुद पनि विद्यार्थीको जीवनको अभिन्न अंग भएको बताए ।

‘विद्यार्थीहरूलाई पढाइसँगै अतिरिक्त क्रियाकलापमा पनि अगाडि बढाउन आवश्यक छ,’ अध्यक्ष कमरले भने, ‘वडाका बालबालिकाहरूको प्रतिभा प्रस्फुटनका लागि आगामी दिनमा पनि यस्ता रचनात्मक कार्यहरूलाई निरन्तरता दिइने छ ।’

मिल्स फार्क क्लबको समन्वयमा भएको यस कार्यक्रमले विद्यालय स्तरमा खेलकुदको जग बलियो बनाउन मद्दत पुग्ने विश्वास लिइएको छ। कार्यक्रममा विद्यालयका प्रधानाध्यापक, शिक्षक, क्लबका प्रतिनिधि तथा स्थानीय शिक्षा प्रेमीहरूको उपस्थिति रहेको थियो।