साकाको ह्याट्रिकमा इंग्ल्यान्डको शानदार जित, एम्बाप्पे बने विश्वकपकै सर्वाधिक गोलकर्ता

अमेरिका । फिफा विश्वकप २०२६ को तेस्रो स्थानका लागि भएको रोमाञ्चक प्रतिस्पर्धामा इंग्ल्यान्डले फ्रान्सलाई ६–४ गोलअन्तरले पराजित गरेको छ ।

इंग्ल्यान्डले तेस्रो स्थान हासिल गर्ने क्रममा मियामी स्टेडियममा आइतबार बिहान सम्पन्न खेलमा कुल १० गोल हुँदा दर्शकले विश्वकपकै सबैभन्दा रोमाञ्चक खेलमध्ये एकको मजा लिए । इंग्ल्यान्डको जितमा बुकायो साका नायक बने । उनले ह्याट्रिक पूरा गर्दै टोलीलाई शानदार जित दिलाए । खेलको तेस्रो मिनेटमै डेक्लान राइसले गोल गर्दै इंग्ल्यान्डलाई अग्रता दिलाएका थिए । त्यसपछि १८औँ मिनेटमा इज्री कोन्साले हेडमार्फत दोस्रो गोल थपे ।

Advertisement

पहिलो हाफको अन्त्यतिर साकाले ३७औँ मिनेट र इन्जुरी समयमा लगातार दुई गोल गर्दै इंग्ल्यान्डलाई पहिलो हाफमै ४–० को बलियो अग्रता दिलाएका थिए ।दोस्रो हाफमा भने फ्रान्सले सशक्त पुनरागमन गर्ने प्रयास गर्‍यो । कप्तान किलियन एम्बाप्पेले ४८औँ मिनेटमा गोल गर्दै टोलीको खाता खोले । त्यसपछि ब्राड्ली बारकोलाले ५४औँ मिनेटमा गोल गरे भने ६६औँ मिनेटमा एम्बाप्पेले व्यक्तिगत दोस्रो गोल गर्दै खेललाई ४–३ को रोमाञ्चक अवस्थामा पुर्‍याए ।

८७औँ मिनेटमा इंग्ल्यान्डले पेनाल्टी पायो र साकाले त्यसलाई सदुपयोग गरे । इन्जुरी समयमा उस्मान डेम्बेलेले फ्रान्सका लागि चौथो गोल फर्काए पनि अन्तिम क्षणमा जुड बेलिङ्घमले गोल गर्दै इंग्ल्यान्डको ६–४ को प्रभावशाली जित सुनिश्चित गरे ।

पराजित टोलीका कप्तान एम्बाप्पेले खेलमा दुई गोल गरे पनि टोलीलाई जिताउन सकेनन् । यद्यपि, दुई गोलसँगै उनले विश्वकप २०२६ मा सर्वाधिक गोल गर्ने खेलाडीको कीर्तिमान कायम गर्दै गोल्डेन बुटको दौडमा पनि सबैलाई पछि पारे ।

सन् १९६६ मा विश्वकपको उपाधि जितेको इंग्ल्यान्डले त्यसयता पहिलो पटक विश्वकपमा तेस्रो स्थान हासिल गरेको हो । यसअघि सन् २०१८ को विश्वकपमा इंग्ल्यान्ड चौथो स्थानमा सीमित भएको थियो ।