कोलकाताबाट औद्योगिक कच्चा पदार्थ बोकेको रेल विराटनगर आइपुग्याे

मुलुकी खबर

२०८३ श्रावण ४, सोमबार १४:४१

विराटनगर । नेपाल–भारत पारवहन सम्झौताअन्तर्गत तेस्रो मुलुकबाट आयातित सामान बोकेको कार्गो रेल पहिलोपटक भारतीय बन्दरगाह कोलकाताबाट सिधै विराटनगर आइपुगेको छ । गत शुक्रबार कोलकाताबाट छुटेको औद्योगिक कच्चा पदार्थ बोकेको रेल सोमबार दिउँसो विराटनगरस्थित ‘कस्टम यार्ड’मा आइपुगेको हो । यससँगै पूर्वी नेपालका उद्योगी–व्यवसायीका लागि ढुवानीमा नयाँ मार्ग खुलेको छ, जसले समय र लागत दुवै बचत हुने विश्वास गरिएको छ ।

पहिलो पटक नियमित सेवाका रूपमा आएको यस कार्गो रेलमा मोरङ–सुनसरी औद्योगिक करिडोरको ‘स्वस्तिक आयल इन्डस्ट्रिज’का लागि तेस्रो मुलुकबाट आयात गरिएको कच्चा पदार्थ ल्याइएको छ ।
यसअघि सडक मार्ग वा भारतको बथनाहासम्म मात्र रेलमा सामान आउने गरेकोमा अब सिधै नेपालको भन्सार बिन्दुसम्म रेल आइपुग्न थालेको हो ।

कार्गो रेल सेवाको औपचारिक शुभारम्भ कोलकातामा एक विशेष समारोहका बीच गरिएको थियो । कोलकातास्थित नेपाली महावाणिज्यदूत झक्कप्रसाद आचार्य, भारतीय भन्सारका उच्च अधिकारी, कोलकाता पोर्ट तथा भारतीय कन्टेनर निगम लिमिटेड (कोनकोर) का प्रतिनिधिहरूले संयुक्त रूपमा हरियो झण्डा देखाएर रेललाई बिदाइ गरेका थिए । सोमबार दिउँसो विराटनगर भन्सार यार्डमा रेल आइपुग्दा भन्सार कर्मचारी, स्थानीय उद्योगी र व्यवसायीहरूले उत्साहका साथ स्वागत गरेका थिए ।

विराटनगरको एकीकृत जाँच चौकीसम्म कार्गो रेल ल्याउने लक्ष्यका साथ २०८० साल जेठ महिनामा परीक्षणका रूपमा एउटा रेल आएको थियो । तर, विभिन्न नीतिगत जटिलता र प्रक्रियागत समन्वयको अभावमा उक्त सेवा नियमित हुन सकेको थिएन । पछिल्लो समय दुई देशका अधिकारीहरूबीच नीतिगत गाँठो फुकाउने र आवश्यक समन्वय गर्ने सहमति भएपछि अब कोलकाताबाट विराटनगरसम्मको रेल ढुवानी नियमित हुने सुनिश्चित भएको छ ।

तपाइको प्रतिक्रिया