जसपा नेपालका चार नेताको सामूहिक राजीनामा: ‘हुंकार मधेश’ अभियानमा सक्रिय 

काठमाडौं । जनता समाजवादी पार्टी (जसपा) नेपालका चार नेताले पार्टीको साधारण सदस्यसमेत नरहने गरी सम्पूर्ण जिम्मेवारीबाट सामूहिक राजीनामा दिएका छन् ।

पूर्वसंघीय सांसद तथा सहिद परिवारकी सदस्य इन्दुकुमारी शर्मा, जसपा नेपालका केन्द्रीय सल्लाहकार सदस्य युसुफ साफी, केन्द्रीय निर्वाचन समिति सदस्य अधिवक्ता घनश्याम शर्मा र युवा नेता पुष्पराज चमनले पार्टीबाट राजीनामा दिएका हुन् ।

राजीनामा दिएका नेताहरूले अब आफूहरू पूर्णकालिक सदस्यका रूपमा  ‘हुंकार मधेश’ अभियानमा सक्रिय हुने बताएका छन् । उनीहरूले पार्टीको जिम्मेवारीबाट अलग हुँदै मधेशका राजनीतिक, सामाजिक तथा समसामयिक विषयलाई केन्द्रमा राखेर अभियानमार्फत सक्रिय हुने जनाएका छन्।

‘हुंकार मधेश’ अभियान २०८३ असोज ९ गते औपचारिक रूपमा घोषणा गरिएको थियो । अभियानले मधेशका विभिन्न सवाललाई उठाउँदै राजनीतिक तथा सामाजिक गतिविधि अघि बढाउने जनाएको छ ।

अभियानले आगामी दिनमा सय दिने  ‘मेची–महाकाली हुलाकी पुनर्जागरण यात्रा’ सञ्चालन गर्ने तयारीसमेत गरेको बताइएको छ । उक्त यात्रामार्फत मधेशका मुद्दालाई देशव्यापी रूपमा जोड्दै अभियानलाई मधेशदेखि देशभर विस्तार गर्ने तयारी रहेको जनाइएको छ ।