सातवटा मुद्दा दायर, एक खर्ब १८ अर्बको दाबी

काठमाडौं । सम्पत्ति शुद्धीकरण विभागले आर्थिक वर्ष २०८२–८३ मा सम्पत्ति शुद्धीकरणसम्बन्धी सातवटा मुद्दा दायर गरेको छ ।

विभागले सार्वजनिक गरेको विवरणअनुसार विभिन्न मुद्दामा १२१ जनालाई प्रतिवादी बनाइएको छ । उनीहरूविरुद्ध करिब एक खर्ब १८ अर्ब पाँच करोड रुपैयाँ बराबरको बिगो दाबी गरिएको छ ।

Advertisement

सम्पत्ति शुद्धीकरण तथा आतंकवादी क्रियाकलापमा वित्तीय लगानीसम्बन्धी प्राप्त सूचनालाई विभागको स्क्रिनिङ कमिटीले अध्ययन गरी प्रारम्भिक अनुसन्धान आवश्यक ठहरेमा अनुसन्धान अधिकृत तोकेर प्रक्रिया अघि बढाइने व्यवस्था रहेको विभागले जनाएको छ ।

विभागमा अनुसन्धान तथा अभियोजनका लागि चारवटा अनुसन्धान शाखासँगै कानुन तथा परामर्श इकाई, प्रशासन तथा योजना शाखा, अनुसन्धान समन्वय शाखा र प्रहरी शाखा सञ्चालनमा छन् ।

सम्पत्ति शुद्धीकरण विभागले राजस्व चुहावट, भन्सार, अन्तःशुल्क तथा व्यापारसँग सम्बन्धित मनी लाउन्डरिङ तथा सम्पत्ति शुद्धीकरण कसुरको अनुसन्धान गर्दै आएको छ । पछिल्लो समय यस्ता कसुरको अध्ययन, अनुसन्धान र तहकिकातलाई थप प्रभावकारी र तीव्र बनाइएको विभागको भनाइ छ ।