विराटनगरमा एमएससी विद्यालयस्तरीय टेबलटेनिस प्रतियोगिता

विराटनगर । विराटनगरमा शनिबारदेखि पहिलो एमएससी विद्यालयस्तरीय टेबलटेनिस प्रतियोगिता सुरु भएको छ । मोरङ स्पोर्टिङ क्लब तथा मोरङ जिल्ला भेट्रान्स टेबलटेनिस संघको संयुक्त आयोजनामा प्रतियोगिता सुरु भएको हो ।

आइतबारसम्म सञ्चालन हुने प्रतियोगितामा जुनियर क्याडेट, सवजुनियर क्याडेटका साथै खुल्ला र ४० वर्षमाथि उमेर समूहको भेट्रान्सबीच प्रतिष्पर्धा भइरहेको मोरङ स्पोर्टिङ क्लबका अध्यक्ष विशाल न्यौपानेले जानकारी दिए । उनका अनुसार प्रतियोगितामा विराटनगरका सामुदायिक र निजी गरी १५ विद्यालयका विद्यार्थी, खुल्ला स्पर्धामा सुनसरी र मोरङका खेलाडी र भेट्रान्समा विराटनगरका गरी १६० खेलाडीहरु सहभागी छन् ।

Advertisement

प्रतियोगिताका विजेता, उपविजेताहरुलाई ट्रफी, मेडल तथा प्रमाणपत्र प्रदान गरिने खेल संयोजक चन्दन ठाकुरले जानकारी दिए । विराटनगरका २२ वटा विद्यालयलाई प्रतियोगिताका लागि आग्रह गरिएकोमा १५ वटा सहभागी भएको संयोजक ठाकुरले बताए ।

कार्यक्रममा टेबलटेनिस पूर्वराष्ट्रिय खेलाडीहरुलाई पनि सम्मान गरिएको छ । सम्मानित हुनेमा पूर्वराष्ट्रिय खेलाडी तथा प्रशिक्षक ध्रव क्षेत्री, शिवनारायण श्रेष्ठ र पूर्वराष्ट्रिय खेलाडी पंकज सापकोटा रहेका छन् । उनीहरुलाई विराटनगर–११ का वडाध्यक्ष तीर्थेन्द्र न्यौपाने, टेबलटेनिस संघका केन्द्रीय उपाध्यक्ष अनुज बानिया, मोरङ स्पोर्टिङ क्लबका अध्यक्ष विशाल न्यौपाने लगायतले सम्मान गरेका थिए ।

टेबलटेनिस संघका केन्द्रीय उपाध्यक्ष बानियाले मोरङ स्पोर्टिङ क्लबको आयोजनामा पहिलो पटक भएको प्रतियोगितामा खेलाडीको उत्साहजनक सहभागिता रहेको बताए । आगामी दिनमा थप टेबलटेनिसका थप कार्यक्रम नियमित रुपमा आयोजना हुने उनको भनाइ छ ।

टेबलटेनिस प्रतियोगिताका अवसरमा खुल्ला आँखा शिविरको पनि आयोजना गरिएको थियो । लाइफ गार्ड अस्पताल र विराट रानी आँखा अस्पतालको प्राविधिक सहयोगमा आयोजित कार्यक्रममा २ सय भन्दा बढीले स्वास्थ्य सेवा लिएका छन् । स्वास्थ्य शिविरमा आँखा परीक्षण, रक्तचाप, मधुमेह लगायतको परीक्षण गरिएको थियो ।