नेप्से सूचक ४.६४ अंकले घट्यो, कारोबार रकम ४ अर्ब ४२ करोडमा सीमित

काठमाडौं। अघिल्लो कारोबार दिन ३३.२८ अंक घटेको सेयर बजार मंगलबार ४.६४ अंक घटेको छ। यो कमीसँगै नेप्से परिसूचक २६९६ अंकमा झरेको छ।

दिनभर बजार उतारचढावपूर्ण रह्यो। कारोबार अवधिभर दिउँसो १२:१० बजे नेप्से न्यूनतम २६८१ अंकसम्म झरेको थियो। आज कारोबार रकममा पनि गिरावट आएको छ। अघिल्लो दिन ६ अर्ब ७ करोडको कारोबार भएकोमा मंगलबार ४ अर्ब ४२ करोड रुपैयाँमा सीमित भयो।

Advertisement

आज ९९ कम्पनीको सेयर मूल्य बढ्दा १६५ कम्पनीको घट्यो भने १३ कम्पनीको मूल्य स्थिर रह्यो। सबै समूहगत सूचकको उतारचढाव १ प्रतिशतभन्दा कम रह्यो। फाइनान्स, होटल तथा पर्यटन, व्यापार र जलविद्युत् समूह बढे भने बैंकिङ, विकास बैंक, लगानी, जीवन बीमा, उत्पादन तथा प्रशोधन, माइक्रोफाइनान्स, निर्जीवन बीमा र अन्य समूह घटेका छन्।

हालै सूचीकृत भएको एभरेस्ट कलरको मूल्य १५ प्रतिशतले बढेको छ। त्यस्तै याम्बलिङ हाइड्रोपावर, सिर्जनशील लघुवित्त र सानीगढ हाइड्रोको मूल्य पनि बढेको छ। कुथेली बुखरी स्मल हाइड्रोपावर, धौलागिरि लघुवित्त र पन्चकन्या माइ हाइड्रोपावरको मूल्यमा गिरावट आएको छ।

कारोबार रकमका आधारमा सेन्ट्रल फाइनान्स, रिडी पावर, सोलु हाइड्रोपावर, ग्लोबल आईएमई बैंक र रिलायन्स स्पिनिङ मिल्स अगाडि रहे।