वीरगन्जमा निर्माणाधीन पुलको खाल्डोमा डुबेर दिदीबहिनीको मृत्यु

काठमाडौं । पर्साको वीरगन्ज महानगरपालिका–२६ सुगौलीमा निर्माणाधीन पुलका लागि खनिएको खाल्डोमा डुबेर दुई जना बालिकाको मृत्यु भएको छ ।

मृत्यु हुनेमा स्थानीय प्रभु ठाकुरका दुई छोरीहरू ५ वर्षीया पुच्की ठाकुर र ३ वर्षीया घघरी ठाकुर रहेको प्रहरीले जनाएको छ । प्रहरीका अनुसार सोमबारदेखि बेपत्ता भएका उनीहरूको शव मंगलबार बिहान चक्रदहमा निर्माणाधीन पुल नजिकै जमेको पानीभित्र डुबेको अवस्थामा फेला परेको थियो ।

Advertisement

सोमबार दिउँसो दुवै बालिकाहरू आफ्ना हजुरबुवा किशोरी ठाकुरसँग चक्रदहस्थित खेतमा गएका थिए । हजुरबुवाले उनीहरूलाई खेतमै छाडेर केही समयका लागि घर आएका थिए । पुनः खेतमा फर्किएर जाँदा बालिकाहरू त्यहाँ नभेटिएपछि परिवारमा खैलाबैला मच्चिएको थियो ।

बालिकाहरू हराएपछि परिवारले आफन्त, छरछिमेक र सम्भावित स्थानहरूमा खोजी गरेका थिए । कतै पत्तो नलागेपछि सोमबार राति करिब ११ बजे बालिकाकी आमा अन्तिमा देवीले इलाका प्रहरी कार्यालय सुगौली बिर्तामा जानकारी गराएको प्रहरीले जनाएको छ ।

प्रहरी टोलीले रातभर खोजी कार्य जारी राखेको थियो । त्यस क्रममा मंगलबार बिहान करिब सवा ६ बजे उनीहरू हराएको स्थानभन्दा करिब ५ सय मिटर पूर्वमा रहेको निर्माणाधीन पुलको खाल्डोमा दुवैको शव फेला परेको हो ।
बालिकाहरू खेल्ने क्रममा खाल्डोमा जमेको पानीमा खसेको प्रारम्भिक अनुमान प्रहरीले गरेको छ । मृतक दुवै बालिकाको शव पोस्टमार्टमका लागि वीरगन्जस्थित नारायणी अस्पतालमा राखिएको छ ।

निर्माणाधीन आयोजनाको लापरबाहीका कारण सुरक्षित घेरा बारा नगर्दा यस्तो दुर्घटना भएको भन्दै स्थानीयले आक्रोश व्यक्त गरेका छन् । घटनाबारे थप अनुसन्धान थालेको प्रहरीले जनाएको छ ।