पहिरोको जोखिम बढेपछि मुग्लिन–नारायणगढ सडकमा राति सवारी चलाउन रोक

चितवन । मुग्लिन बजार नजिकैको खहरे खोला क्षेत्रमा पटक–पटक पहिरो खसेर जोखिम बढेपछि जिल्ला प्रशासन कार्यालय चितवनले मुग्लिन–नारायणगढ सडक खण्डमा रातिको समयमा सवारी आवागमन बन्द गर्ने निर्णय गरेको छ ।

प्रशासनले जारी गरेको सूचना अनुसार मंगलबार राति ८ः०० बजेदेखि बुधबार बिहान ५ः०० बजेसम्मका लागि यस सडक खण्डमा सबै प्रकारका सवारी साधन सञ्चालनमा रोक लगाइएको हो । रातिको समयमा यात्रा गर्दा हुन सक्ने सम्भावित मानवीय क्षति र जोखिमलाई मध्यनजर गर्दै यो निर्णय लिइएको प्रशासनले जनाएको छ ।
मुग्लिन–नारायणगढ सडक खण्डको मुग्लिन बजार नजिकै रहेको खहरे खोलामा मंगलबार दिनभर तीन पटक सुख्खा पहिरो खसेको छ ।

Advertisement

पहिलो पटक बिहान ७ः३० बजे पहिरो खसेको थियो, जसलाई करिब ५ घण्टाको प्रयासपछि हटाइएको थियो। सडक खुलेको डेढ घण्टा नबित्दै पुनः दोस्रो पटक पहिरो खसेपछि आवागमन अवरुद्ध भएको थियो, जुन करिब एक घण्टामा सुचारु भयो । तर, साँझ करिब ६ः०० बजे पुनः तेस्रो पटक ठुलो पहिरो खसेपछि अहिले सो सडक खण्ड पूर्ण रूपमा अवरुद्ध बनेको सडक डिभिजन कार्यालय चितवनले जनाएको छ।

सडक डिभिजन कार्यालयका अनुसार अहिले इन्जिनियरसहितको टोली पहिरो स्थलमा खटिएको छ । पहिरो पन्छाउन अझै १ देखि २ घण्टा लाग्न सक्ने अनुमान गरिएको छ। पहिरोको जोखिम अझै कायमै रहेकाले सुरक्षाका दृष्टिले रातको समयमा यात्रा नगर्न सडक कार्यालयले सबैलाई आग्रह गरेको छ ।

जिल्ला प्रशासन कार्यालयले यात्रु तथा सवारी चालकहरूलाई वैकल्पिक मार्ग प्रयोग गर्न र सम्बन्धित निकायको सूचना पालना गर्न अनुरोध गरेको छ ।