घट्यो नेप्से, परिसूचक २६८८ अंकमा झर्‍यो

काठमाडौं । अघिल्लो दिन ४.६४ अंकले घटेको सेयर बजार परिसूचक नेप्सेमा बुधबार पनि गिरावट आएको छ । ७.७९ अंकको गिरावटसँगै नेप्से परिसूचक २६८८ अंकमा झरेको छ । बजारमा लगातार तेस्रो दिन पनि ओरालो यात्रा जारी रहेको हो ।

कारोबारका क्रममा दिउँसो १२:४० बजे नेप्से दिनभरिकै उच्च विन्दु २७०६ अंकसम्म पुगेको थियो । तर त्यसपछि ओरालो लागेको बजार अन्तिम समयसम्म कायम रह्यो । अघिल्लो दिन ४ अर्ब ४२ करोड रूपैयाँको कारोबार भएकोमा बुधबार कारोबार रकम घटेर ४ अर्ब २ करोडमा सीमित भएको छ ।

Advertisement

यस दिन ७८ कम्पनीको सेयर मूल्य बढ्दा १८६ कम्पनीको घटेको छ भने ११ कम्पनीको मूल्य स्थिर रहेको छ । सबै समूहगत सूचकमा १ प्रतिशतभन्दा कमको उतारचढाव देखिएको छ । अन्य समूह ०.४३ प्रतिशतले बढ्दा बाँकी सबै उपसूचक घटेका छन् ।

बैंकिङ ०.२७, विकास बैंक ०.४२, फाइनान्स ०.५७, होटल तथा पर्यटन ०.५२, जलविद्युत् ०.३९, लगानी ०.२४, जीवन बीमा ०.१९, उत्पादन तथा प्रशोधन ०.५५, माइक्रोफाइनान्स ०.६०, निर्जीवन बीमा ०.५७ र व्यापार समूह ०.०१ प्रतिशतले घटे ।

नेप्सेमा सूचीकृत भएपछि एभरेस्ट कलरको सेयर मूल्य १५ प्रतिशतले बढ्ने क्रम बुधबार पनि कायम रह्यो । स्नो रिभर्सको ४.९०, खानीखोला हाइड्रोपावरको ३.६२, हिमालयन पावर पार्टनरको ३.३५ र मेन्छियाम हाइड्रोपावरको २.२४ प्रतिशतले मूल्य बढेको छ ।

मातृभूमि लघुवित्तको ४.५४, कर्पोरेट डेभलपमेन्ट बैंकको ४.४२ र शुभम् पावरको सेयर मूल्य ४.२६ प्रतिशतले घट्यो ।कारोबार रकमका आधारमा हिमालयन पावर पार्टनर, खानीखोला हाइड्रोपावर, रिलायन्स स्पिनिङ मिल्स, कर्पोरेट डेभलपमेन्ट बैंक, सेन्ट्रल फाइनान्स र रिडी पावर अगाडि रहे ।