देवानगन्जमा जनप्रतिनिधि र प्रहरीको पहलपछि भिड साम्य, घाइते महिलाको विराटनगरमा उपचार हुँदै

मुलुकी खबर

२०८३ श्रावण १७, आइतबार १५:५४

विराटनगर । सुनसरीको देवानगन्ज गाउँपालिका–४ कप्तानगन्जमा घाँस काट्न गएकी महिलालाई ढुंगा लागेपछि उत्पन्न तनाव जनप्रतिनिधि र प्रहरीको सक्रिय पहलपछि साम्य भएको छ ।

जनप्रतिनिधि र प्रहरीको पहलपछि भिड साम्य भएको हो । अहिले अवस्था सामान्य बनेको भए पनि सम्भावित अप्रिय घटना रोक्न ठूलो संख्यामा नेपाल र सशस्त्र प्रहरी परिचालन गरी सुरक्षा व्यवस्था कडा पारिएको छ । घाँस काट्न गएकी देवानगन्ज–४ की ३३ वर्षीया सरस्वतीकुमारी मेहता आइतबार बिहान करिब ११ः३० बजेतिर टाउकोमा ढुंगा लागेर घाइते भएकी थिइन् ।

स्थानीयका अनुसार गुलेलीबाट प्रहार गरिएको ढुंगा लाग्दा उनको टाउकोमा चोट लागेको हो । यद्यपि, ढुंगा कसले प्रहार गरेको भन्ने विषय अझै खुल्न नसकेको प्रहरीले जनाएको छ । घाइते मेहताको विराटनगरस्थित न्युरो अस्पतालमा उपचार भइरहेको छ । अवस्था सामान्य रहेको चिकित्सकले बताएका छन् ।

घटनापछि स्थानीय बासिन्दा महिलामाथि ढुंगा प्रहार गर्ने व्यक्तिलाई तत्काल कारबाही गर्नुपर्ने माग गर्दै कप्तानगन्जमा भेला भएका थिए । करिब डेढ सय जनाको भिड जम्मा भएपछि फेरि तनाव बढ्ने संकेत देखिएको भन्दै सुरक्षा सतर्कता बढाइएको थियो ।

परिस्थिति बिग्रिन सक्ने अवस्था देखिएपछि गाउँपालिका अध्यक्ष बेचनप्रसाद मेहतासहितका जनप्रतिनिधि र इलाका प्रहरी कार्यालय देवानगन्जका इन्स्पेक्टर प्रकाश पराजुली नेतृत्वको प्रहरी टोली घटनास्थल पुगेको थियो । जनप्रतिनिधि र प्रहरीले स्थानीयलाई सम्झाइबुझाइ गरेपछि भिड तितरबितर भएको र अवस्था सामान्य बनेको घटनास्थलमा रहेका नेपाल पत्रकार महासंघ सुनसरीका अध्यक्ष सन्तोष काफ्लेले बताए । उनका अनुसार भिड बढ्दै गएर परिस्थिति भड्किने संकेत देखिएपछि त्यसलाई रोक्न जनप्रतिनिधि र सुरक्षाकर्मीले तत्काल घटनास्थलमा पुगेर प्रभावकारी पहल गरेका थिए ।

यद्यपि, सम्भावित तनावलाई ध्यानमा राख्दै घटनास्थल तथा आसपासका क्षेत्रमा ठूलो संख्यामा नेपाल र सशस्त्र प्रहरी परिचालन गरिएको छ । प्रहरीले ढुंगा प्रहारमा संलग्न व्यक्तिको पहिचान तथा खोजी कार्य जारी रहेको र घटनाको अनुसन्धान भइरहेको जनाएको छ ।

देवानगन्जमा दुई समूहबीच भएको विवाद हिंसात्मक बनेपछि साउन १० गते राति सशस्त्र प्रहरीले नियन्त्रणका क्रममा गोली चलाएको थियो । उक्त घटनामा घाइते भएकामध्ये हालसम्म दुई जनाको मृत्यु भइसकेको छ भने अन्य आठ जना उपचाररत छन् ।

त्यस घटनापछि सुनसरीका विभिन्न स्थानमा आगजनी, तोडफोड, आक्रमण र लुटपाटका घटना भएका थिए । शान्ति सुरक्षाको अवस्था पूर्ण रूपमा सामान्य भइनसकेको भन्दै प्रशासनले निषेधाज्ञा लागू गरिरहेको छ । अवस्था विस्तारै सामान्य बन्दै गइरहेका बेला आइतबारको नयाँ घटनाले पुनः सुरक्षा सतर्कता बढाउनुपर्ने अवस्था आएको गाउँपालिका अध्यक्ष मेहताले बताए ।