बलिउडका चर्चित अभिनेता प्रदीप रावतको निधन

मुम्बई । बलिउडका दिग्गज अभिनेता प्रदीप रावतको ७४ वर्षको उमेरमा मंगलबार निधन भएको छ । सुपरहिट चलचित्रहरू ‘लगान’ र ‘गजनी’ मा प्रभावशाली भूमिका निभाएका रावतको उपचारका क्रममा निधन भएको हो ।
उनका प्रबन्धक सिद्धार्थ तिवारीका अनुसार रावत विगत केही वर्षदेखि रक्त क्यान्सरसँग जुधिरहेका थिए । स्वास्थ्यमा समस्या देखिएपछि उनी विगत दुई महिनादेखि अस्पतालमा भर्ना थिए ।

प्रदीप रावतले बी.आर. चोपडाको चर्चित टेलिभिजन सिरियल ‘महाभारत’ मा ‘अश्वत्थामा’ को भूमिका निभाएर घरघरमा पहिचान बनाएका थिए । उनले ‘लगान’ मा ‘देवा’ र ‘गजनी’ मा शीर्ष खलनायकको भूमिका निर्वाह गरेका थिए, जसलाई दर्शकले निकै रुचाएका थिए । हिन्दीबाहेक उनले नेपाली, तेलुगु, तमिल र कन्नड लगायतका विभिन्न भाषाका चलचित्रमा समेत आफ्नो अभिनय कला प्रस्तुत गरेका थिए ।

Advertisement

उनको निधनको खबरले भारतीय चलचित्र उद्योग स्तब्ध बनेको छ । अभिनेता सोनु सूदले ‘प्रदीप रावत भाइ, तपाईंलाई सधैँ याद गरिनेछ’ भन्दै सामाजिक सञ्जालमा श्रद्धाञ्जली अर्पण गरेका छन् । त्यस्तै सह कलाकार यशपाल शर्मा लगायतका कलाकारहरूले पनि उनको निधनप्रति गहिरो दुःख व्यक्त गरेका छन् । रावतको निधनसँगै बलिउडले एक कुशल र शक्तिशाली अभिनेता गुमाएको छ ।