नेपाल आयल निगमको कार्यकारी निर्देशकमा नागेन्द्र साह नियुक्त

काठमाडौं। सरकारले नेपाल आयल निगम लिमिटेडको कार्यकारी निर्देशक पदमा नागेन्द्र साहलाई नियुक्त गरेको छ। बुधबार बसेको मन्त्रिपरिषद् बैठकले साहलाई निगमको प्रमुख कार्यकारीका रूपमा नियुक्त गर्ने निर्णय गरेको मुख्यसचिव गोविन्दबहादुर कार्कीले जानकारी दिए।

उद्योग, वाणिज्य तथा आपूर्ति मन्त्रालयले खुला प्रतिस्पर्धाबाट कार्यकारी निर्देशक छनोट गर्न दरखास्त आह्वान गरेको थियो। सोही प्रक्रियाबाट निगमका पूर्वनिमित्त कार्यकारी निर्देशक साहका साथै कौशल केसी र सञ्जीवकुमार देव अन्तिम तीनमा सिफारिस भएका थिए। निगममै काम गरेको लामो अनुभवका आधारमा मन्त्रिपरिषद्ले साहलाई नेतृत्व सुम्पिने निर्णय गरेको हो।

नवनियुक्त कार्यकारी निर्देशक साहका सामु अहिले विभिन्न चुनौतीपूर्ण जिम्मेवारीहरू रहेका छन्। विशेष गरी देशका विभिन्न भागमा देखिएको खाना पकाउने ग्यासको अभाव र उपभोक्ताहरू लाइनमा बस्नुपर्ने बाध्यतालाई तत्काल अन्त्य गर्नु उनको प्राथमिक चुनौती हुनेछ।