तीन निर्माण कम्पनी तथा आपूर्तिकर्ता कालोसूचीमा

मुलुकी खबर

२०८३ श्रावण २६, मंगलबार १०:३१

काठमाडौं । सार्वजनिक खरिद अनुगमन कार्यालयले विभिन्न निकायको सिफारिसमा तीन वटा निर्माण कम्पनी तथा आपूर्तिकर्तालाई कालोसूचीमा राखेको छ। प्रधानमन्त्री तथा मन्त्रिपरिषद्को कार्यालयअन्तर्गत रहेको केसरमहलस्थित कार्यालयको २०८३ साउन २५ गतेको निर्णयानुसार सार्वजनिक खरिद ऐन, २०६३ को दफा ६३ को उपदफा (१) बमोजिम साउन २६ गते सूचना प्रकाशित गर्दै ती कम्पनीहरूलाई कालोसूचीमा राखिएको जानकारी गराइएको छ।

टोखा नगरपालिका नगर कार्यपालिकाको कार्यालयको सिफारिसमा टोखा-०८ काठमाडौँस्थित स्पेक्स नेपाल प्रालिलाई १ वर्षका लागि कालोसूचीमा राखिएको छ। यस कम्पनीका मुख्य व्यक्ति प्रदिप केसी हुन्। त्यसैगरी सडक डिभिजन डोटीको सिफारिसमा गोकर्णेश्वर-०८ काठमाडौँस्थित जेडिएमआर बिल्डर्स प्रालिलाई १ वर्ष ६ महिनाका लागि कालोसूचीमा राखिएको छ। सो कम्पनीका मुख्य व्यक्ति रविप्रकाश सिंह रहेका छन्।

नेपाल विद्युत् प्राधिकरण दरबारमार्गको सिफारिसमा भारतको हैदरावादस्थित एमएस श्रुष्टि कन्टेक प्रालिलाई ३ वर्षका लागि कालोसूचीमा राखिएको छ। यस कम्पनीका मुख्य व्यक्ति राजशेखर रेड्डी र स्मिता शुक्ला हुन्। कालोसूचीमा राखिएको अवधिभर सम्बन्धित निर्माण व्यवसायी तथा आपूर्तिकर्ताहरूले सार्वजनिक निकायको कुनै पनि खरिद कारबाहीमा सहभागी हुन पाउने छैनन्। यो निर्णय सूचना प्रकाशित भएको मितिदेखि नै लागू भइसकेको कार्यालयले जनाएको छ।

तपाइको प्रतिक्रिया