नेपाल टेलिकमले कमायो ८ अर्ब ८६ करोड

काठमाडौं। नेपाल टेलिकमले गत आर्थिक वर्ष २०८२/८३ को चौथो त्रैमासिकसम्म ८ अर्ब ८६ करोड ४६ लाख रुपैयाँ खुद मुनाफा कमाएको छ। कम्पनीले सार्वजनिक गरेको अपरिस्कृत वित्तीय विवरण अनुसार अघिल्लो आर्थिक वर्ष २०८१/८२ को सोही अवधिको तुलनामा खुद मुनाफा ४७.५८ प्रतिशतले बढेको हो।

अघिल्लो आर्थिक वर्षको चौथो त्रैमासिकसम्म टेलिकमको खुद मुनाफा ६ अर्ब ६७ लाख रुपैयाँ रहेकोमा एक वर्षको अवधिमा २ अर्ब ८५ करोड ७९ लाख रुपैयाँले वृद्धि भएको छ। कम्पनीका अनुसार समीक्षा अवधिमा करअघिको मुनाफा ३४.६६ प्रतिशतले बढेर १३ अर्ब २६ करोड ४७ लाख रुपैयाँ पुगेको छ। अघिल्लो आवको सोही अवधिमा यस्तो मुनाफा ९ अर्ब ८५ करोड २ लाख रुपैयाँ रहेको थियो।

यसैगरी, कम्पनीको ब्याज, कर, ह्रासकट्टी तथा अमोर्टाइजेसनअघिको आम्दानी १०.७३ प्रतिशतले बढेर २० अर्ब ४८ करोड १ लाख रुपैयाँ पुगेको छ। कुल सञ्चालन आय ३.१२ प्रतिशतले बढेर ३४ अर्ब ९५ करोड ४ लाख रुपैयाँ पुगेको छ भने कुल आय २.६५ प्रतिशतले वृद्धि भई ३९ अर्ब १९ करोड ९६ लाख रुपैयाँ पुगेको छ।

ब्याजदर क्रमिक रूपमा घट्दा कम्पनीको ब्याज आम्दानी भने २२.८८ प्रतिशत (करिब ८६ करोड १९ लाख रुपैयाँ) ले घटेको छ। मुख्य दूरसञ्चार सेवा, विशेषगरी जिएसएम सेवातर्फको राजस्व ६४ करोड ५४ लाख रुपैयाँ (२.२८ प्रतिशत) ले बढेकाले समग्र सञ्चालन आय तथा मुनाफामा सकारात्मक प्रभाव परेको टेलिकमले जनाएको छ।