२०८३ भाद्र ६, शनिबार १०:४१
जन्मँदै मर्दै, जन्मँदै मर्दै
यो धरतीबाट मैले
हरेक युगका
धेरै सूर्योदयहरू देखेँ,
र चन्द्रको शीतलता तापें।
नदीको चाल
र समुद्रको छाल सुनेँ,
पहाडबाट खसेको
छहराको लहरा
र हिमालको टाकुरा टेकेँ।
चराको मीठो चिरबिर
र उत्सवको दुन्दुभी सुनेँ,
शीतको थोपा हाँसेको बेला
फूलहरूको सुगन्धबीच
प्रेमीहरू नाचेको हेरेँ!
जन्मँदै मर्दै, जन्मँदै मर्दै
युगौँ-युग यो धरतीमा,
उज्यालो र अन्धकार,
जन्म र मृत्यु-
सबैसँग साक्षात्कार गरेँ!
यो मेरो अन्तिम जन्म हो,
पुनर्जन्म हुनेछैन!
जब तिम्रो मिलनमा
प्रेमले पूर्णता
र चाहनाहरू शून्यतामा विलीन भए…
यो धरती, यो आकाश
सबै-सबै बिलाएर गए,
छ त केवल अनन्त शून्यता!
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
×
