टेबल टेनिस संघको अध्यक्षमा राजेशमान श्रेष्ठ निर्विरोध निर्वाचित

विराटनगर । कोशी प्रदेश टेबल टेनिस संघको अध्यक्षमा राजेशमान श्रेष्ठ निर्विरोध निर्वाचित भएका छन् ।विराटनगरमा सम्पन्न संघको प्रथम साधारणसभाले श्रेष्ठको अध्यक्षतामा ९ सदस्यीय नयाँ कार्यसमिति सर्वसम्मत चयन गरेको हो ।

नयाँ कार्यसमितिको उपाध्यक्षमा अभिनायक मल्ल, सचिवमा शरदरत्न पर्थिव र कोषाध्यक्षमा सर्जु थापा देवान निर्वाचित भए । त्यस्तै, सत्यनारायण राजभण्डारी, विपिन तुलाधर, रामबहादुर श्रेष्ठ, सुमित शाह र गौरी मास्के सदस्यमा निर्वाचित भए ।

Advertisement

साधारण सभाको उद्‌घाटन सत्रमा कोशी प्रदेश खेलकुद विकास बोर्डका उपाध्यक्ष वसन्तराज अर्याल, नेपाल टेबल टेनिस संघका केन्द्रीय अध्यक्ष विजेन्द्र हमाल, केन्द्रीय उपाध्यक्षहरू अनुज बानियाँ र मनोहर पोखरेल, कोशी प्रदेश बोर्डका सदस्य प्रवीण कार्की लगायतले शुभकामना मन्तव्य गरे । उनीहरूले प्रदेशमा टेबल टेनिस खेलको व्यावसायिक विकास र खेलाडीहरूको क्षमता अभिवृद्धिमा नयाँ कार्यसमितिले महत्त्वपूर्ण भूमिका खेल्ने विश्वास व्यक्त गरे ।

साधारण सभाको अवसर पारेर टेबुल टेनिसका पूर्वराष्ट्रिय खेलाडी राजेश लोहनीलाई सम्मान गरिएको थियो ।
नवनिर्वाचित कार्यसमितिको पहिलो बैठकले संघको संरचनालाई थप मजबुत बनाउन केही महत्त्वपूर्ण निर्णयहरू गरेको छ । बैठकले प्रदेश उपाध्यक्षमा सन्तोष अग्रवाललाई मनोनीत गरेको छ भने सल्लाहकारमा डा. मनोज लाखे र ध्रुव क्षेत्रीलाई चयन गरेको छ ।

साथै, प्रदेशका बाँकी जिल्लाहरूमा टेबल टेनिस संघ विस्तार गर्ने र संघलाई कोशी प्रदेश खेलकुद विकास बोर्डमा विधिवत् दर्ता गर्ने निर्णय समेत बैठकले गरेको नवनिर्वाचित अध्यक्ष श्रेष्ठले जानकारी दिए ।