गण्डकी प्रदेशको भ्रमण सकेर काठमाडौं फर्किँदै, प्रधानमन्त्री शाह

काठमाडौं । प्रधानमन्त्री बालेन्द्र शाह (बालेन) आफ्नो तीन दिने गण्डकी प्रदेशको भ्रमण पूरा गरी सोमबार (आज) काठमाडौं फर्किँदै छन् । गत शुक्रबार परिवारसहित निजी भ्रमणमा निस्किएका शाह सडकमार्ग हुँदै मुस्ताङसम्म पुगेर फर्किएका हुन् ।

भ्रमण तालिकाअनुसार शुक्रबार काठमाडौंदेखि सडकमार्ग हुँदै पोखरा पुगेका शाह सोही दिन कास्कीको माछापुच्छ्रे गाउँपालिका–६ अस्तामस्थित अन्नपूर्ण इकोभिलेज रिसोर्टमा बास बसेका थिए । शनिबार उनी मुस्ताङ पुगेका थिए भने आइतबार मुस्ताङबाट फर्किएर पुनः पोखराकै एक रिसोर्टमा बसेका थिए ।

Advertisement

कास्कीका सहायक प्रमुख जिल्ला अधिकारी चित्राङ्गत बरालका अनुसार यो भ्रमण नितान्त पारिवारिक र निजी भएकाले यसको औपचारिक कार्यक्रमहरू केही थिएनन् । ‘उहाँको भ्रमण विशुद्ध व्यक्तिगत थियो, त्यसैले हामीलाई पनि धेरै जानकारी दिइएको थिएन,’ बरालले भने ।

सडक मार्गबाटै यात्रा गर्न रुचाउने शाहले यस पटकको भ्रमणमा हिमाली जिल्ला मुस्ताङको प्राकृतिक सुन्दरताको अवलोकन गरेका थिए । उनी आज सडकमार्गबाटै काठमाडौं फर्कने तयारीमा छन् ।