बाढी प्रभावितलाई प्रधानमन्त्रीको ढाडस: ‘तपाईंहरू एक्लो हुनुहुन्न, राज्य साथमा छ’

काठमाडौं । प्रधानमन्त्री बालेन्द्र शाहले बाढी प्रभावित क्षेत्रका आमाबुबाहरूलाई आफूहरू एक्लो नरहेको महसुस गर्न आग्रह गर्दै राज्य र सरकार उनीहरूको साथमा रहेको बताएका छन् ।

उनले सामाजिक सञ्जालमार्फत एक सन्देश जारी गर्दै बाढीका कारण पीडामा परेका ज्येष्ठ नागरिकहरूलाई सरकारले अभिभावकत्व प्रदान गर्ने प्रतिबद्धता व्यक्त गरेका हुन् । प्रधानमन्त्रीले भनेका छन्, ‘तपाईंहरू एक्लो हुनुहुन्न, राज्य तपाईंको साथमा छ, सरकार तपाईंको साथमा छ ।’

Advertisement

नुवाकोटको विदुर–१० बेत्रावतीमा सशस्त्र प्रहरी र नेपाल प्रहरीको संयुक्त टोलीले ६४ वर्षीया चन्द्रिका श्रेष्ठलाई उद्धार गरेको प्रसंग उल्लेख गर्दै प्रधानमन्त्रीले यस खबरले सिंगो देशलाई नै आशा दिएको बताए । उनले भने, ‘यो खबरले हामी खोज तथा उद्धारमा अझै डटेर लागिरहेका छौँ भन्ने सन्देश दिएको छ ।’ सरकारले चन्द्रिका श्रेष्ठको उमेर समूहका र त्योभन्दा माथिल्लो उमेरका धेरै आमाबुबाहरूलाई प्रभावित क्षेत्रबाट सुरक्षित उद्दार गरिसकेको उनले जानकारी दिए ।

बाढीका क्रममा ज्येष्ठ नागरिकहरूले भोग्नुपरेको कठिन परिस्थितिको स्मरण गर्दै प्रधानमन्त्रीले आफ्नै ज्यानको परवाह नगरी नातिनातिना जोगाउन वृद्धवृद्धाहरूले देखाएको हिम्मतको प्रशंसा गरे । बाढीले घर आँगन, खेतबारी, चौतारी र वर्षौंदेखिको थातथलो बगाउँदा ज्येष्ठ नागरिकको दैनिकी कष्टकर बनेको र कतिपयले आफ्नै आँखाअगाडि सन्तान र जीवनसाथी गुमाउनुपरेको भन्दै उनले गहिरो दुःख व्यक्त गरेका छन् ।

बाढीका कारण विस्थापित भएका ज्येष्ठ नागरिकहरूलाई सरकारले होल्डिङ सेन्टर र अस्थायी शिविरहरूमा राहत, स्वास्थ्य सेवा र जीवनयापनका लागि आवश्यक सुविधा पुर्‍याइरहेको प्रधानमन्त्रीले जानकारी दिए ।
नुवाकोटको देवीघाट ज्येष्ठ नागरिक संरक्षण तथा अध्ययन प्रतिष्ठान क्षतिग्रस्त भएपछि त्यहाँ रहेका सात जनालाई काठमाडौंको म्हैपीस्थित नेपाल सिनियर केयरमा र १७ जनालाई नुवाकोटको इनारपाटीस्थित कृष्ण प्रणामी मन्दिरमा आश्रय दिइएको छ । उनीहरूलाई ह्विलचियर, वाकर तथा मनोसामाजिक परामर्श सेवा समेत उपलब्ध गराइएको छ । प्रधानमन्त्रीले अस्थायी बसाइलाई छिटोभन्दा छिटो टुङ्ग्याएर सुरक्षित बसोबासको व्यवस्था मिलाउने आश्वासन दिए ।

आफन्त र सम्पत्ति गुमाएका नागरिकहरूको आक्रोशलाई स्वाभाविक रूपमा लिनुपर्ने बताउँदै प्रधानमन्त्रीले संवेदनशील घडीमा पीडितमाथि अनावश्यक टिप्पणी गर्ने वा हियाउने व्यक्तिहरू विरुद्ध सरकार निर्मम हुने चेतावनी दिए । ‘पीडामा रहेका मानिसको आक्रोशलाई संयमपूर्वक सुन्नुपर्छ, पीडितलाई थप पीडा दिनेलाई सरकारले छोड्ने छैन,’ उनले भने ।

आफ्नो ज्यान जोखिममा राखेर उद्धार र खोजी कार्यमा खटिएका सुरक्षाकर्मीहरूप्रति प्रधानमन्त्रीले आभार प्रकट गरे । दलदल र खण्डहरमा निरन्तर काम गरिरहेका सुरक्षाकर्मीको आत्मबल बढाउनु सबैको कर्तव्य भएको उनको भनाइ छ ।
सन्देशको अन्त्यमा प्रधानमन्त्रीले बाढीमा ज्यान गुमाएका नागरिकहरूप्रति श्रद्धाञ्जली अर्पण गर्दै ज्येष्ठ नागरिकहरूलाई देशको जग र मार्गदर्शकका रूपमा स्वीकार गर्दै बलियो मन बनाउन आग्रह गरे ।