एसिसी प्रिमियर कपः साउदी अरेबियाद्वारा नेपाललाई १९१ रनको लक्ष्य 

काठमाडौं । मलेसियामा जारी तेस्रो संस्करणको एसिसी प्रिमियर मेन्स कप एक दिवसीय क्रिकेट प्रतियोगितामा साउदी अरेबियाले नेपालसामु १९१ रनको चुनौतीपूर्ण लक्ष्य प्रस्तुत गरेको छ ।

क्वालालम्पुरस्थित वायुमास ओभल मैदानमा टस जितेर पहिले ब्याटिङ रोजेको साउदी अरेबियाले ४९.२ ओभरमा सबै विकेट गुमाउँदै १९० रन बनायो । साउदीका लागि अब्दुल वाहिदले सर्वाधिक ७७ रनको योगदान दिए भने महम्मुद अतिफले ३० रन जोडे ।

Advertisement

साउदीलाई मध्यम स्कोरमा रोक्न नेपाली बलरहरूले उत्कृष्ट प्रदर्शन गरे । नेपालका लागि स्पिनरद्वय सन्दीप लामिछाने र दीपेन्द्र सिंह ऐरीले समान ३–३ विकेट लिए । त्यस्तै, ललित नारायण राजवंशीले २ विकेट हात पार्दै साउदीको ब्याटिङ लाइनलाई दबाबमा राखे ।

नेपाल अहिले केहीबेरमा १९१ रनको लक्ष्य पछ्याउँदै जवाफी ब्याटिङका लागि मैदान उत्रिँदै छ। नेपाल आजको खेल जितेर एक खेल अगावै प्रतियोगिताको सेमिफाइनलमा आफ्नो स्थान सुरक्षित गर्न चाहन्छ । यसअघि खेलिएका दुवै खेलमा नेपाल विजयी भइसकेको छ । पहिलो खेलमा बहराइनलाई ७ विकेट र दोस्रो खेलमा आयोजक मलेसियालाई ६ विकेटले पराजित गरेको नेपाल उच्च मनोबलमा छ।

समूह ‘ए’ मा रहेको नेपाल हाल २ खेलबाट ४ अंक जोड्दै तालिकाको शीर्ष स्थानमा छ । अर्कोतर्फ, साउदी अरेबिया भने ३ खेलबाट मात्र २ अंकका साथ तालिकाको पुछारमा रहेको छ । आजको जितले नेपाललाई समूह विजेता बन्ने बाटोमा अझ बलियो बनाउनेछ ।