‘जेन्जी आन्दोलनको भावनाविपरीत सरकार हाइज्याक गर्नेहरूको प्रभावमा चल्यो’

काठमाडौं । नेकपा (एमाले) का महासचिव शंकर पोखरेलले वर्तमान सरकार ‘जेन्जी आन्दोलन’ को वास्तविक भावना अनुसार नभई आन्दोलनलाई ‘हाइज्याक’ गर्नेहरूको प्रभावमा चलेको आरोप लगाएका छन् ।

आन्दोलनका क्रममा ज्यान गुमाएका युवाको सम्झनामा जारी वक्तव्यमा पोखरेलले मृतकप्रति श्रद्धाञ्जली र पीडित परिवारप्रति समवेदना व्यक्त गर्दै यस्तो धारणा राखेका हुन् ।

Advertisement

उनले भ्रष्टाचार नियन्त्रण, सुशासन, सहज सेवा प्रवाह र सामाजिक सञ्जालको प्रयोगसम्बन्धी युवाका माग जायज र साझा सरोकारका विषय भएको बताएका छन् । सामाजिक सञ्जाल नियमनका लागि तत्कालीन सरकारले ल्याएको दर्ता नीति स्पष्ट नभएका कारण युवाहरू सडकमा आउनुपरेको उनको भनाइ छ ।

शान्तिपूर्ण प्रदर्शनलाई नियोजित रूपमा हिंसात्मक बनाउने षड्यन्त्र भएको दाबी गर्दै पोखरेलले आन्दोलनमा घुसपैठ गर्ने र गराउने योजनाकार तथा षड्यन्त्रकारीको पहिचान गरी कानुनी कारबाही गर्नुपर्ने बताए ।

‘शान्तिपूर्ण प्रदर्शनमा घुसपैठ गर्ने र गराउने योजनाकार तथा षड्यन्त्रकारीहरूको पहिचान गरी उनीहरूलाई कानुनी कारबाहीको दायरामा ल्याउनु नै जेन्जी आन्दोलनको वास्तविक भावनाको सम्मान गर्नु हो,’ उनले भनेका छन् ।

एमाले सधैँ युवाको पक्षमा रहेको दाबी गर्दै पोखरेलले विगतमा युवाका माग सम्बोधन गर्ने क्रममा भएका कमजोरी सच्याउँदै अघि बढ्न पार्टी प्रतिबद्ध रहेको बताए । देशमा सुशासन र विधिको शासन स्थापना गर्नु अहिलेको प्रमुख आवश्यकता रहेको भन्दै उनले युवाका जायज माग सम्बोधन गर्न एमाले सधैँ तत्पर रहेको बताएका छन् ।