बीबीए कप बास्केटबल: अरनिकोलाई छात्र र छात्राको उपाधि 

विराटनगर । विराटनगरमा सम्पन्न भएको ‘७ औँ बीबीए कप अन्तर विद्यालय होम एन्ड अबे बास्केटबल लिग’ प्रतियोगिताको उपाधि विराटनगरकै अरनिको स्कुलले जितेको छ । विराटनगर बास्केटबल एकेडेमीले आयोजना गरेको प्रतियोगिताअन्तर्गत छात्र र छात्रातर्फ दुवैको उपाधि अरनिको स्कुलले जितेको छ ।

अरनिको स्कुलले छात्र तथा छात्रा दुवै विधातर्फ साबिक विजेता विराटनगरको बालकल्याण विद्या मन्दिर (बीकेभीएम)लाई पराजित गर्दै दोहोरो स्वर्ण पदक जितेको हो ।  फाइनल खेलमा छात्रातर्फ अरनिकोले बीकेभीएमलाई ५२–३८ अंकको अन्तरले पराजित गर्‍यो भने छात्रतर्फ अरनिकोले बीकेभीएममाथि ८७–४१ को फराकिलो अंकका साथ पराजित गर्‍यो ।

Advertisement

त्यस्तै, तेस्रो स्थानका लागि भएको खेलमा छात्रतर्फ सगरमाथा स्कुल र छात्रातर्फ एभरेस्ट स्कुल विजयी भयो ।
प्रतियोगिताको अरनिकोका आलोक यादव (छात्रतर्फ) र आवृत्ति भण्डारी (छात्रातर्फ) ‘मोस्ट भ्यालुएबल प्लेयर’ भए । इमरजिङ प्लेयर छात्रतर्फ अरनिकोका आसिफ अली र छात्रातर्फ सेन्ट जोसेफकी मानवी राजवंशीले भए ।
त्यसै, डिफेन्सिभ प्लेयर छात्रतर्फ अरनिकोका अर्णव कटवाल र छात्रातर्फ एभरेस्टकी अन्वेषा श्रेष्ठ भए ।  उत्कृष्ट ‘कोच अफ दि लिग’ छात्रतर्फ अरनिकोका दीपेश कटवाल र छात्रातर्फ बीकेभीएमका बर्दनकुमार साह घोषित भए ।

खेलाडीहरूलाई कार्यक्रमका प्रमुख अतिथि कोशी प्रदेश खेलकुद विकास बोर्डका सदस्यसचिव विप्लव घोष र विशेष अतिथि श्री शिवदल गणका गणपति अनिल बस्नेत, विराटनगर बास्केटबल एकेडेमी (बीबीए) का अध्यक्ष सरोज लम्साल लगायतले पुरस्कार प्रदान गरे ।