चारवटा विधेयकलाई प्रक्रियामा लैजाने तयारी

काठमाडौं । प्रतिनिधिसभाको बैठक आज (बुधबार) दिउँसो १ बजे सिंहदरबारस्थित संघीय संसद् भवनमा बस्दैछ । बैठकमा विभिन्न चारवटा विधेयकलाई संसदीय प्रक्रियामा अघि बढाउने प्रस्तावमाथि छलफल हुने कार्यसूची छ ।

बैठकमा कानुन, न्याय तथा संसदीय मामिला मन्त्री सोविता गौतमले मेलमिलापसम्बन्धी दोस्रो संशोधन विधेयक, २०८३ लाई दफावार छलफलका लागि सम्बन्धित समितिमा पठाउने प्रस्ताव प्रस्तुत गर्ने सम्भावित कार्यसूची रहेको छ । मन्त्री गौतमले नै नेपाल कानुन आयोग (पहिलो संशोधन) विधेयक, २०८३ र निःशुल्क कानुनी सहायतासम्बन्धी विधेयक, २०८३ लाई पनि दफावार छलफलका लागि सम्बन्धित समितिमा पठाउने प्रस्ताव प्रस्तुत गर्नेछिन् ।

Advertisement

त्यसैगरी कृषि, वन तथा पर्यावरणमन्त्री गीता चौधरीले राष्ट्रियसभामा उत्पत्ति भएको संक्रामक पशु रोग (नियन्त्रण) विधेयक, २०८३ लाई दफावार छलफलका लागि सम्बन्धित समितिमा पठाउने प्रस्ताव राख्ने कार्यसूची छ । विज्ञान, प्रविधि तथा नवप्रवर्तन मन्त्री महावीर पुनले भने राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८३ लाई पारित गरियोस् भन्ने प्रस्ताव प्रस्तुत गर्नेछन् ।

प्रतिनिधिसभाको बैठकसँगै बुधबार संघीय संसद्का चारवटा संसदीय समितिको बैठकसमेत बस्दैछ । संसद् सचिवालयका अनुसार अर्थ समिति, कानुन, न्याय तथा मानव अधिकार समिति, विकास, आर्थिक मामिला तथा सुशासन समिति र विधायन व्यवस्थापन समितिको बैठक बस्नेछ ।