कांग्रेस सभापतिमा गगनको उम्मेदवारी

काठमाडौं । नेपाली कांग्रेसको सभापति पदका लागि गगन थापाले उम्मेदवारी दर्ता गराएका छन् ।

विशेष महाधिवेशनबाट सभापतिको जिम्मेवारी सम्हालेका थापाले आगामी नेतृत्वका लागि पुनः आफ्नो दाबी प्रस्तुत गरेका हुन् । थापाको उम्मेदवारीसँगै कांग्रेस सभापति निर्वाचनमा औपचारिक रूपमा दुई जनाको दावेदारी परेको छ । यसअघि श्यामकृष्ण खड्गीले सभापति पदमा उम्मेदवारी दर्ता गराइसकेका छन् ।

सभापतिका अर्का आकांक्षी किशोरसिंह राठोर पनि प्रतिस्पर्धाको तयारीमा छन् । यद्यपि, उनले भने हालसम्म उम्मेदवारी दर्ता गराएका छैनन् ।

थापाको उम्मेदवारीमा कृष्ण बानिया, देउकुमार थेवे र करुणा कटुवाल प्रस्तावक रहेका छन् । उनको उम्मेदवारीलाई सुशन वैद्य, गोमा राई र मनोज भट्टले समर्थन गरेका छन् ।

सभापति पदका लागि उम्मेदवारी दर्ता सुरु भएसँगै कांग्रेसको आगामी नेतृत्व कसको हातमा जाने भन्ने विषयमा महाधिवेशनको राजनीतिक प्रतिस्पर्धा थप स्पष्ट हुँदै गएको छ ।