बिर्तामोडमा फर्निचर पसलमा आगलागी, एक जना घाइते

झापा । झापाको बिर्तामोड नगरपालिका–४ अन्नपूर्ण चोकमा फर्निचर पसलमा आगलागी हुँदा एक जना घाइते भएका छन् । आगलागीबाट एउटा घरसहित फर्निचर उद्योग तथा सो रुम पूर्ण रूपमा जलेर क्षति भएको प्रहरीले जनाएको छ ।

प्रहरीका अनुसार बुधबार बिहान करिब १०ः४५ बजेतिर स्थानीय देवी सुब्बाको तीन तले पक्की घरको भुइँतलामा उनका छोरा हर्कजंग सुब्बाले सञ्चालन गरेको देवी उडन फर्निचर पसलमा आगलागी भएको हो । आगलागीको कारण भने तत्काल खुल्न सकेको छैन ।

आगलागीबाट सोही घरसँग जोडिएको कृष्णकुमारी राईको घरमा भाडामा सञ्चालन हुँदै आएको दिव्याश्री अग्रवालको जय ट्रेड फर्निचर फ्याक्ट्री एन्ड सो रुम पूर्ण रूपमा जलेर नष्ट भएको छ । आगलागीका कारण सो भवनमा समेत पूर्ण क्षति पुगेको प्रहरीले जनाएको छ । पछाडि रहेका अन्य दुई वटा घरमा समेत आगोको रापका कारण सामान्य क्षति पुगेको बताइएको छ ।

आगलागी भएको घरबाट सामान निकाल्ने क्रममा अर्जुनधारा नगरपालिका–३ का ३९ वर्षीय तिलबहादुर रम्तेल एक तलामाथिबाट हामफाफ्दा दाहिने खुट्टामा चोट लागेको छ र उनको बिर्तासिटी अस्पतालमा उपचार भइरहेको प्रहरीले जनाएको छ ।

आगलागीको सूचना प्राप्त हुनासाथ इलाका प्रहरी कार्यालय अनारमनी, जिल्ला प्रहरी कार्यालय झापाको टोली र सशस्त्र प्रहरी बेस क्याम्प शनिश्चरेको टोली घटनास्थल पुगी आगो नियन्त्रणमा सहयोग गरेका थिए । प्रहरी, स्थानीय तथा मेचीनगर, बिर्तामोड र भद्रपुर नगरपालिकाका दमकलको सहयोगमा आगो दिउँसो  नियन्त्रणमा लिइएको प्रहरीले जनाएको छ। आगो दिउँसो १ बजेतिर पूर्ण रूपमा नियन्त्रणमा आएको प्रहरीले जनाएको छ ।

आगलागीबाट भएको क्षतिको यकिन विवरण तथा आर्थिक मूल्यांकन हुन बाँकी रहेको प्रहरीले जनाएको छ ।