महिलामाथि सत्तारुढ रास्वपाका सांसदको अत्याचार

काठमाडौं । सत्तारुढ राष्ट्रिय स्वतन्त्र पार्टी (रास्वपा)का सांसद खगेन्द्र सुनारमाथि एक महिलालाई अश्लील भिडियो देखाएर ब्ल्याकमेल गरेको, रकम मागेको र ज्यान मार्ने धम्की दिएको गम्भीर आरोप सार्वजनिक भएको छ ।

सार्वजनिक भएका अडियो संवादमा महिलामाथि अपमानजनक गालीगलौज, मानसिक यातना र आर्थिक दबाब दिइएको सुनिन्छ । अडियोमा सुनारले महिलालाई फेसबुक खाता निष्क्रिय नगर्न चेतावनी दिँदै आफूले भनेअनुसार नभए परिणाम भोग्नुपर्ने आशयका धम्की दिएको सुनिन्छ । उनले साँझसम्म पैसा उपलब्ध गराउन पटकपटक दबाब दिएको र महिलालाई राजीनामा दिन निर्देशन दिएको संवादमा उल्लेख छ ।

बागमती प्रदेशकी पूर्वराज्यमन्त्रीसमेत रहेकी ती महिलाले आफ्नो नग्न भिडियो बनाइएको, आफूलाई कुटपिट गर्ने, मार्ने तथा काट्ने धम्की दिइएको र पैसा नदिँदा थप यातना भोग्नुपरेको बताएकी छन् । अडियोमा उनले आफूले यस्तो व्यवहार कहिलेसम्म सहने भन्दै सुनारमाथि प्रश्न गरेकी छन् ।

महिलाले पैसा जुटाउने सहमति जनाएपछि सुनारले जहाँबाट भए पनि रकम पठाउन भनेको सुनिन्छ । त्यसक्रममा महिलाले आफूले के गल्ती गरेको भनेर रुँदै प्रश्न गर्दा सुनारले बलात्कारसम्बन्धी आपत्तिजनक टिप्पणी गरेको अडियोमा सुनिएको समाचारमा उल्लेख छ ।

सुनारले ती महिलालाई एक कांग्रेस नेतासँग नाम जोडेर अपमानजनक शब्द प्रयोग गरेको संवादसमेत सार्वजनिक भएको छ । घटनाका बारेमा महिलाले बागमती प्रदेशका तत्कालीन मुख्यमन्त्री राजेन्द्र पाण्डेलाई समेत जानकारी गराएर सुनारलाई सम्झाइदिन आग्रह गरेको समाचारमा उल्लेख छ ।

पाण्डेका अनुसार आफू मुख्यमन्त्री रहेका बेला ती महिलाले श्रीमानबाट कुटपिट भएको भन्दै उजुरी गरेकी थिइन् । त्यसपछि उनले महिलाको सुरक्षामा खटिएकी महिला गार्डलाई गोप्य रूपमा बोलाएर सोधपुछ गरेका थिए । गार्डले उनीहरूबीच कुकुर–बिरालोको जस्तो झगडा हुने गरेको बताएको र आफूलाई उक्त जिम्मेवारीबाट हटाइदिन आग्रह गरेको पाण्डेको भनाइ छ । तर, अहिले सार्वजनिक भएको घटनामा आरोपित व्यक्ति सांसद सुनार नै रहेको जानकारी आफूलाई नभएको उनले बताएका छन् ।

यसैबीच, सुनारको बैंकिङ कारोबारमाथि पनि प्रश्न उठाइएको छ । सिटीजन्स, एनआईएमबी, महालक्ष्मीलगायतका बैंकमा रहेका खाताबाट भएका कारोबारको विवरण शंकास्पद देखिएको छ । बेलायत, जापान र भारतलगायतका देशबाट उनको खातामा लाखौँ रुपैयाँ आएको अभिलेख भेटिएको समाचारमा उल्लेख छ ।

जनआस्थाले प्राप्त गरेको भनिएको ४८० पृष्ठको बैंकिङ कारोबार विवरणमा विभिन्न रकमको लेनदेन देखिए पनि ती रकम कुन प्रयोजनका लागि पठाइएका हुन् भन्ने स्पष्ट नभएको समाचारमा जनाइएको छ । यद्यपि, कारोबारको विवरण मात्रका आधारमा रकमको स्रोत वा कुनै गैरकानुनी गतिविधि पुष्टि भने हुँदैन ।

आरोपबारे प्रतिक्रिया लिन जनआस्थाले सांसद सुनारलाई सम्पर्क गर्ने प्रयास गरेको थियो । संसद् सचिवालयमा उल्लेखित उनको मोबाइल नम्बर बन्द रहेको र स्वकीय सचिव राजु सुनारले पनि कुराकानीका लागि समय मिलाउन नसकेको समाचारमा उल्लेख छ ।

दलित अधिकारका क्षेत्रमा अभियन्ताका रूपमा परिचित हुँदै राजनीतिमा आएका सुनारमाथि सार्वजनिक भएका आरोपले उनको राजनीतिक तथा सार्वजनिक भूमिकामाथि प्रश्न उठाएको छ । महिलामाथि सत्तारुढ सांसदले चरम अत्याचार गरेको विषय बाहिरिँदा पनि सरकार र उनी आबद्ध दलले भने कुनै प्रतिक्रिया जनाएका छैनन् । आरोपका बारेमा उनको आधिकारिक प्रतिक्रिया, सम्बन्धित निकायको अनुसन्धान र घटनाको स्वतन्त्र पुष्टि हुन बाँकी छ ।

स्रोत : जनआस्था