विमानस्थल आसपास चंगा, ड्रोन र बेलुन उडाउन रोक

काठमाडौं । नेपाल नागरिक उड्डयन प्राधिकरणले गौतम बुद्ध अन्तर्राष्ट्रिय विमानस्थल आसपासका क्षेत्रमा चंगा, ड्रोन तथा बेलुन उडाउने गतिविधि नगर्न सर्वसाधारणलाई आग्रह गरेको छ ।

गौतम बुद्ध अन्तर्राष्ट्रिय विमानस्थल नागरिक उड्डयन कार्यालयले सूचना जारी गर्दै विमानस्थल आसपास यस्ता गतिविधि गर्दा हवाई उडानको सुरक्षामा गम्भीर असर पर्न सक्ने जनाएको हो ।

कार्यालयले विमानस्थल आसपासको हवाई आवागमन हुने तथा विमान उडान र अवतरण गर्ने क्षेत्रमा चंगा उडाउने, ड्रोन सञ्चालन गर्ने र बेलुन उडाउनेलगायतका गतिविधि नगर्न तथा नगराउन सम्बन्धित सबैलाई अनुरोध गरेको छ ।

सूचनाको अवज्ञा गर्दै निषेधित गतिविधि गरेको वा गराएको पाइएमा प्रचलित कानुनबमोजिम कडा कारबाही गरिने कार्यालयले चेतावनी दिएको छ ।

विमानस्थलको उडान सुरक्षालाई प्राथमिकतामा राख्दै सम्भावित जोखिम न्यूनीकरण गर्न र सुरक्षित हवाई आवागमन सुनिश्चित गर्न कार्यालयले सबैलाई जिम्मेवार बन्न आग्रह गरेको छ ।