धरानमा लागुऔषधका मुद्दा सर्वाधिक, तीन वर्षमा ४०६ घटना प्रहरीमा दर्ता

धरान । सुनसरीको धरानमा लागुऔषध नियन्त्रणका लागि विभिन्न प्रयास भइरहे पनि यससँग सम्बन्धित कसुरका घटना प्रहरीमा उल्लेख्य रूपमा दर्ता भइरहेका छन् । इलाका प्रहरी कार्यालय धरानको तथ्यांकअनुसार पछिल्ला तीन आर्थिक वर्षमा लागुऔषधसम्बन्धी ४०६ मुद्दा दर्ता भएका छन् ।

प्रहरीका अनुसार आर्थिक वर्ष २०८१–८२ देखि चालु आर्थिक वर्ष २०८३–८४ को असोजसम्म धरानमा विभिन्न कसुरका कुल एक हजार १७२ मुद्दा दर्ता भएका छन् । तीमध्ये लागुऔषधसम्बन्धी मुद्दाको संख्या सबैभन्दा बढी रहेको छ ।

इलाका प्रहरी कार्यालय धरानका प्रमुख डीएसपी भीषणबाबु राईका अनुसार आर्थिक वर्ष २०८१–८२ मा विभिन्न कसुरमा ५१७ मुद्दा दर्ता भएका थिए । उक्त वर्ष ५८१ पुरुष र ६८ महिला पक्राउ परेका थिए । आर्थिक वर्ष २०८२–८३ मा ४९४ मुद्दा दर्ता हुँदा ५०९ पुरुष र ४७ महिला पक्राउ परेका थिए ।

त्यस्तै, चालु आर्थिक वर्ष २०८३–८४ को साउनदेखि असोजसम्म १६१ मुद्दा दर्ता भएका छन् । यस अवधिमा १०३ पुरुष र आठ महिलासहित १११ जना पक्राउ परेको जानकारी डीएसपी राईले दिए ।

लागुऔषधबाहेक अभद्र व्यवहार, बैंकिङ कसुर, कर्तव्य ज्यान, चोरी, बहुविवाह, भवितव्य ज्यान र जबर्जस्ती करणीका घटनामा समेत प्रहरीले मुद्दा दर्ता गरेको छ । प्रहरीका अनुसार लागुऔषधको प्रयोग तथा कारोबारमा ज्याला मजदुरी गर्ने र बेरोजगार युवाको संलग्नता बढी देखिएको छ । १५ देखि ५५ वर्ष उमेर समूहका व्यक्तिहरू यस्तो गतिविधिमा बढी संलग्न रहेको पाइएको राईले बताए ।

लागुऔषध ओसारपसार तथा बिक्री वितरणमा संलग्न व्यक्तिले प्रहरीको निगरानी छल्न विभिन्न उपाय अपनाउने गरेको पनि प्रहरीले जनाएको छ । उनीहरूले सवारीसाधनमा लागुऔषध लुकाउने, फल्स बटम बनाउने तथा शरीरका विभिन्न भागमा लुकाएर ओसारपसार र बिक्री वितरण गर्ने गरेको पाइएको जानकारी डीएसपी राईले दिए ।

नियन्त्रणका लागि प्रहरी र स्थानीयस्तरबाट प्रयास भइरहे पनि लागुऔषधसम्बन्धी मुद्दा धरानमा सबैभन्दा बढी देखिनुले यसको रोकथाम र नियन्त्रणलाई थप प्रभावकारी बनाउनुपर्ने आवश्यकता औँल्याएको छ ।