लागुऔषध मुद्दामा रास्वपा सुरुंगा नगर सभापति पक्राउ

सप्तरी । राष्ट्रिय स्वतन्त्र पार्टी (रास्वपा) सप्तरीको सुरुंगा नगरपालिका सभापति साविर हुसेन लागुऔषध मुद्दामा पक्राउ परेका छन् ।

इलाका प्रहरी कार्यालय लहानको टोलीले हुसेनलाई सुरुंगा नगरपालिका–४ स्थित कदमाहा बजारमा रहेको पार्टी कार्यालयबाट पक्राउ गरेको हो ।

जिल्ला प्रहरी कार्यालय सिरहाका सूचना अधिकारी तथा प्रहरी नायब उपरीक्षक रमेशबहादुर पालले लागुऔषध मुद्दामा फरार रहेका हुसेन पक्राउ परेको पुष्टि गरेका छन् ।

प्रहरीका अनुसार २०८१ मंसिर २९ गते धनगढीमाई नगरपालिका–१० स्थित जिरोमाइलमा पूर्व–पश्चिम राजमार्गमा भएको सवारी दुर्घटनापछि कारबाट एक क्विन्टल ३० किलो गाँजा बरामद भएको थियो ।

पूर्वबाट पश्चिमतर्फ जाँदै गरेको ना.३ ख ७५९१ नम्बरको ट्रकले उत्तरतर्फबाट राजमार्ग पार गर्दै गरेको बा. ८ च ९९६३ नम्बरको कारलाई ठक्कर दिएको थियो । दुर्घटनापछि कारमा खानतलासी गर्दा पाँचवटा पोकामा राखिएको गाँजा बरामद भएको प्रहरीले जनाएको छ ।

घटनापछि प्रहरीले कार, ट्रक र ट्रकका चालकलाई नियन्त्रणमा लिएको थियो । तर, कारका चालक भने फरार भएका थिए । प्रहरीका अनुसार सोही घटनासम्बन्धी लागुऔषध मुद्दामा हुसेन पक्राउ परेका हुन् ।