चियाबगान सञ्चालकविरुद्ध उजुरी दिने माई नगरपालिकाको तयारी

इलाम । इलामको माई नगरपालिकाले सोक्तिम र चिलिमकोट चियाबगान सञ्चालन गर्दै आएका नेपाल चिया विकास निगम लिमिटेड र साँघाई कम्पनीविरुद्ध उजुरी दिने तयारी गरेको छ ।

माई नगरपालिकाका प्रमुख खम्बासिं लिम्बुका अनुसार पटक–पटक सचेत गराउँदा पनि चियाबगान सञ्चालकले अटेर गरेपछि पाँचबुँदे मागसहित जिल्ला प्रशासन कार्यालय इलाममा ज्ञापनपत्र बुझाउन लागिएको हो । त्यसका लागि नगर कार्यपालिकाको निर्णयअनुसार स्थानीयवासीको हस्ताक्षर सङ्कलन भइरहेको उनले बताए ।

नगरपालिकाले चियाबगानमा प्रतिबन्धित विषादीको प्रयोग, साल तथा साखु जातका रूख कटान, चिया प्रशोधनमा दाउराको प्रयोग, बजार क्षेत्रमा रबरका रूख रोपण, मजदुरलाई न्यूनतम पारिश्रमिक उपलब्ध नगराइएको र स्थानीय कर नतिरेको विषय उठाएको छ । यी गतिविधिले मानव स्वास्थ्य, वातावरण र स्थानीय अर्थतन्त्रमा असर पारेको नगरपालिकाको दाबी छ ।

नगरप्रमुख लिम्बुका अनुसार असोज २७, २८ र २९ गते हस्ताक्षर सङ्कलन गरी असोज ३० गते स्थानीयवासीको उपस्थितिमा जिल्ला प्रशासन कार्यालयमा ज्ञापनपत्र बुझाउने तयारी छ । ज्ञापनपत्रमार्फत सम्बन्धित निकायको ध्यानाकर्षण गराउँदै समस्याको समाधान र आवश्यक कारबाहीका लागि पहल गरिने उनले बताए ।

यसैबीच, माई नगर मेयर कप फुटबल प्रतियोगिता–२०८३ सञ्चालन भइरहेका बेला चिलिमकोट चियाबगान हुँदै वैकल्पिक सडक निर्माण गरेको विषयमा नेपाल चिया विकास निगम लिमिटेड र साँघाई कम्पनीले नगरपालिकाविरुद्ध उजुरी दिएको बुझिएको छ । सडक निर्माणका क्रममा एक हजार २०० भन्दा बढी चियाका बोट काटिएको आरोप लगाउँदै निगमले २५ लाख रुपैयाँ क्षतिपूर्ति माग गरेको स्रोतले जनाएको छ ।

चियाबगान व्यवस्थापन, वातावरण संरक्षण, मजदुरको पारिश्रमिक, स्थानीय कर र वैकल्पिक सडक निर्माणका विषयमा नगरपालिका तथा चियाबगान सञ्चालकबीच विवाद बढ्दै गएको छ । यस विषयमा दुवै पक्षका दाबीको आधिकारिक पुष्टि तथा सम्बन्धित पक्षको प्रतिक्रिया आउन बाँकी छ ।