काँकडभिट्टा-लौकही सडकको पूर्वी खण्डमा दैनिक ४०० मिटर कालोपत्रे

विराटनगर । काँकडभिट्टा–लौकही सडक आयोजना अन्तर्गत काँकडभिट्टा–सितापुरी सडक खण्डमा दैनिक औसत ४०० मिटर सडक कालोपत्रे भइरहेको छ । सडक निर्माणले गति लिएसँगै आयोजनाको पूर्वी खण्डको समग्र भौतिक प्रगति करिब ५५ प्रतिशत पुगेको छ ।

भौतिक पूर्वाधार तथा यातायात मन्त्री सुनिल लम्सालले सामाजिक सञ्जालमार्फत सार्वजनिक गरेको विवरणअनुसार आयोजनाअन्तर्गत हालसम्म २५ किलोमिटर सडक कालोपत्रे गरी यातायात सञ्चालनमा ल्याइसकिएको छ । बाँकी खण्डमा पनि सडक निर्माण तथा कालोपत्रेको काम भइरहेको छ ।

कुल १० अर्ब ६ करोड रुपैयाँ लागत रहेको काँकडभिट्टा–लौकही सडक आयोजनाको निर्माण कार्य चालु वर्षभित्र सम्पन्न गर्ने लक्ष्य राखिएको छ । आयोजना सम्पन्न भएपछि पूर्वी नेपालको सडक यातायात थप सहज हुने अपेक्षा गरिएको छ ।