भिटामिन ‘ए’ र जुकाको औषधि खुवाउने मिति सर्‍यो

स्वास्थ्य सेवा विभागका अनुसार पहिलो चरणको राष्ट्रिय भिटामिन ‘ए’ तथा जुकाको औषधि वितरण कार्यक्रम कात्तिक १७ र १८ गते सञ्चालन गरिने भएको छ।

सरकारले सामान्यतया हरेक वर्ष पहिलो चरणमा कात्तिक २ र ३ गते तथा दोस्रो चरणमा वैशाख ६ र ७ गते बालबालिकालाई भिटामिन ‘ए’ र जुकाको औषधि खुवाउँदै आएको छ। तर, यस वर्ष कात्तिक २ र ३ गते दसैँको सार्वजनिक बिदा परेकाले कार्यक्रम पछाडि सारिएको विभागले जनाएको छ।

कार्यक्रमअन्तर्गत ६ देखि ५९ महिनासम्मका बालबालिकालाई भिटामिन ‘ए’ क्याप्सुल खुवाइनेछ भने १२ देखि ५९ महिनासम्मका बालबालिकालाई जुकाको औषधि दिइनेछ।

विभागले निर्धारित मितिमा आफ्ना बालबालिकालाई नजिकैको भिटामिन ‘ए’ तथा जुकाको औषधि वितरण केन्द्रमा लगेर औषधि खुवाउन अभिभावकलाई आग्रह गरेको छ।

बालबालिकामा भिटामिन ‘ए’ को कमीबाट हुने स्वास्थ्य समस्या न्यूनीकरण गर्न तथा जुकाको संक्रमणबाट जोगाउन सरकारले हरेक वर्ष नियमित रूपमा यो कार्यक्रम सञ्चालन गर्दै आएको छ।