पोल्यान्डमा गोली प्रहार : ६ जनाको मृत्यु , १५ घाइते

काठमाडौं ।  पोल्यान्डको ऐतिहासिक सहर क्राकोमा एक व्यक्तिले अन्धाधुन्ध गोली चलाउँदा कम्तीमा ६ जनाको मृत्यु भएको छ भने १५ जना घाइते भएका छन् । घटनामा संलग्न भएको आरोपमा प्रहरीले एक संदिग्धलाई नियन्त्रणमा लिएको छ। संदिग्धको घरमा थप तीन जनाको शवसमेत फेला परेपछि घटनाको अनुसन्धान थप जटिल बनेको छ।

शनिबार दिउँसो क्राकोको मुख्य बजार क्षेत्रमा भएको गोली काण्डमा चार महिला र दुई पुरुषको मृत्यु भएको पोलिस अधिकारीहरूले जनाएका छन्। घाइतेमध्ये पाँच जना विदेशी नागरिक रहेको बताइएको छ। स्थानीय समयअनुसार दिउँसो करिब ३ बजे गोली चलेको सूचना पाएपछि प्रहरी घटनास्थल पुगेको थियो।

प्रहरीका अनुसार संदिग्धले कारबाट गोली चलाउँदै बजार क्षेत्रमा रहेका मानिसहरूमाथि अन्धाधुन्ध आक्रमण गरेका थिए। गोली चलेपछि बजार क्षेत्रमा भागाभाग मच्चिएको थियो। प्रत्यक्षदर्शीका अनुसार मानिसहरू ज्यान जोगाउन नजिकका पसल तथा रेस्टुरेन्टमा लुक्न पुगेका थिए। प्रहरीले जवाफी कारबाहीका क्रममा गोली चलाएपछि संदिग्धलाई घाइते अवस्थामा नियन्त्रणमा लिएर अस्पताल पुर्‍याएको थियो।

घटनापछि संदिग्धको घरमा खोजी गर्दा ओस्त्रोवियेत्स स्विएन्तोक्रिस्कीस्थित निवासमा दुई महिला र एक पुरुषको शव फेला परेको प्रधानमन्त्री डोनाल्ड टस्कले जानकारी दिएका छन्। उनीहरू संदिग्धका नजिकका परिवारका सदस्य हुन सक्ने प्रारम्भिक अनुमान गरिए पनि ती हत्याको क्राको गोली काण्डसँग सम्बन्ध भए–नभएकोबारे अनुसन्धान भइरहेको छ।

प्रहरीका अनुसार संदिग्ध पोल्यान्डकै नागरिक हुन्। उनको कारबाट थप हतियार र ठूलो परिमाणमा गोलीगट्ठासमेत बरामद भएको छ। गृहमन्त्री मार्सिन किएर्विन्स्कीले संदिग्ध दक्षिणपन्थी अतिवादी विचारधाराबाट प्रभावित भएको हुन सक्ने प्रारम्भिक संकेत देखिएको बताएका छन्। यद्यपि, आक्रमणको वास्तविक उद्देश्य भने खुल्न सकेको छैन।

प्रधानमन्त्री टस्क घटनाबारे जानकारी लिन क्राको पुगेका थिए। उनले गोली चलेको सूचना प्राप्त भएको करिब तीन मिनेटमै प्रहरीले कारबाही अघि बढाएको भन्दै सुरक्षाकर्मीको तत्कालको हस्तक्षेपको प्रशंसा गरेका छन्। घटनाको अनुसन्धानमा प्रहरीसँगै आन्तरिक सुरक्षा निकायसमेत परिचालित भएको छ।

घटनापछि क्राकोमा शोकको वातावरण छाएको छ। सहरका मेयरले बुधबारसम्म शोक अवधि घोषणा गरेका छन् भने राष्ट्रपति कारोल नाभ्रोस्कीले नोभेम्बर ८ र ९ मा राष्ट्रिय शोक मनाउने घोषणा गरेका छन्। युक्रेनी राष्ट्रपति भोलोदिमिर जेलेन्स्की र युरोपेली संघकी विदेशनीति प्रमुख काया कलासले पनि घटनाप्रति दुःख व्यक्त गर्दै पीडित परिवारप्रति समवेदना प्रकट गरेका छन्।

करिब तीन करोड ८० लाख जनसंख्या रहेको पोल्यान्ड युरोपेली संघ र नेटोको सदस्य राष्ट्र हो। त्यहाँ सामूहिक गोली काण्ड तुलनात्मक रूपमा दुर्लभ मानिन्छ। पछिल्लो घटनाले पोल्यान्डमा हिंसात्मक अतिवाद र सार्वजनिक सुरक्षाबारे चिन्ता थप बढाएको छ।