
काठमाडौँ । आगामी फागुन २१ गते हुने प्रतिनिधिसभा निर्वाचनका लागि अब ५४ दिन बाँकी रहँदा निर्वाचन आयोगले आफ्नो तयारी तीव्र पारेको छ। निर्वाचनलाई स्वच्छ, निष्पक्ष र मर्यादित बनाउन आयोगले आगामी माघ ३ गतेदेखि निर्वाचन आचारसंहिता लागू गर्ने तयारी गरेको छ।
आयोगका पदाधिकारीहरूले शुक्रबार प्रधानमन्त्री सुशीला कार्कीलाई भेटेर निर्वाचनको हालसम्मको प्रगतिबारे विस्तृत जानकारी गराएका छन्। भेटका क्रममा कार्यवाहक प्रमुख निर्वाचन आयुक्त रामप्रसाद भण्डारीले निर्वाचन सामग्रीको छपाइ, जनशक्ति व्यवस्थापन र सुरक्षा तयारीबारे प्रधानमन्त्रीलाई अवगत गराएका हुन्।
आचारसंहिता लागू भएपछि सरकारी तथा गैरसरकारी निकायले गर्न पाउने गतिविधि र राजनीतिक दलहरूको भूमिकाबारे आयोगले स्पष्ट पारेको छ। ‘निर्वाचनलाई भयरहित वातावरणमा सम्पन्न गर्न आचारसंहिताको पूर्ण पालना अनिवार्य छ,’ आयोगका प्रवक्ता नारायणप्रसाद भट्टराईले भने। आयोगले आचारसंहिता उल्लंघन गर्नेलाई कडा कारबाही गरिने चेतावनी समेत दिएको छ।
प्रधानमन्त्री कार्कीले निर्वाचनका लागि आवश्यक पर्ने सुरक्षा र बजेट लगायतका सबै प्रबन्ध मिलाउन सरकार प्रतिबद्ध रहेको बताउँदै आयोगको तयारीप्रति सन्तोष व्यक्त गरेकी छन्। निर्वाचन कार्यतालिका अनुसार अबको केही दिनमै प्रत्यक्षतर्फको उम्मेदवारी मनोनयन लगायतका प्रक्रियाहरू समेत सुरु हुनेछन्।

























